Ndaw ngoenzgyaj, gou daeuj daengz laeng daxbuz lajmbanj. Youq gizneix, gou guh gvaq haujlai saeh yinxdaeuz youq ndaw singz mbouj miz banhfap guh haenx, daegbied dwg vat duzndwen caeuq ep duzbaeu, haenx caen dwg duenh ginglig nanzlumz ndeu ha!

Banhaet, ndit con gvaq geh mbawfaex set youq gwnzdieg, hawj daengx mbanj longz hwnj geu buh saekgim. Gou caeuq gyoengq doengzdoih iq daiq doengj iq caeuq fagcanj iq, angqvauvau daeuj daengz gyangdoengh, caepcawq vat duzndwen. Dou yaeng’yaeng buedhai cazrum, yungh fagcanj iq siujsim sisi fan naeznamh. Yaep ndeu, duz ndwen hoengzndaem ndeu couh cakyedyed youq dangqnaj dou, de youq ndaw namh baenq bae baenq dauq, lumjnaeuz cingq ndaq dou nyauxluenh de hawj de mbouj ndaej youq dingh. Dou angq dwk gip de hwnjdaeuj cuengq haeuj ndaw doengj iq bae, caiq bae ra duz moq. Yaepyet, ndaw doengj iq couh cang le haj roek duz ndwen.

Vat duzndwen sat le, dou youh daeuj daengz henz dah ep duzbaeu. Dou ra sienq caeuq ganjset daeuj, dawz gij ndwen youh feih youh ndeigwn haenx con youq gwnz sienq, caiq dawz de venj youq gwnz ganjset, yienzhaeuh dawz sienq cuengq roengz ndaw dah, fwngz gaem ganjset. Yaep ndeu, couh miz duzbaeu haeb set lo, dou yaeng’yaeng dawz duzbaeu rag hwnj hamq, yawj de vad song faj gimz, ndaw sim gou youh angq youh gaenjcieng. Dou dawz duzbaeu cuengq haeuj ndaw doengj iq, laebdaeb ep lingh duz. Duzbaeu ndaw dah neix lai dahraix, yaep ndeu, doengj iq couh cang rim lo.

Youq ndaw ndwenngoenz lajmbanj, gou lij guh le haujlai saeh mizyinx, lumjnaeuz: Mbaet mak、cuengq yiuhrumz、gaeb duznon…… Youq gizneix, gou ndaej liz gij nauhyied caeuq hoenghhwd ndaw singz gyae’gyae, gamjsouh gij caemdingh caeuq gyaeundei ndaw doengh. Dou youq ndaw doenghnaz buetyat, youq henz dah iq coemj bya, youq ndaw suenmak cimz mak, gvaq le aen ngoenzgyaj angqvau ndeu.

Youq ndaw ndwenngoenz lajmbanj, yinxdaeuz caeuq doeksaet angq rim ngoenz liux. Gou maqmuengh ngoenzgyaj baezlaeng caiq baez daeuj daengz gizneix, gvaq gij saedceij vaiqvued lajmbanj.

(Cangh Yenhih raiz Lingz Hinghningz hoiz)