Va la va la——Naedfwn lumj naedcaw mae roix goenq nei doeksatsat. Hunglung sing ndeu, byajraez lo, naedfwn lumjbaenz naedrin doek roengz namh, raemx sinz baenz va. Gou caeuq daxmeh dangq boux dangq gang liengj, caij raemxfwn ganj bae ranz.

Seizneix, bakroen miz saekheu ndeu ronghsadsad——Bouxgyauhgingj lumj gocoengz enjaek ndwn youq gyang roen. De itndeu vadfwngz hawj ci dingz, itndeu youh dazyinx ci menhmenh hai baenaj. Dungcoz de aen aen cungj biucinj、mizrengz, lumjbaenz caeuq fwnhung beij ak.

Dou laebdaeb byaij baenaj, gvax gvaq gokhaw, gou yawjraen yahbuz ndeu gaem faexdwngx youq gyang fwn byaij dwgrengz yedyed. Sawqmwh, yahbuz fwngz unq faexdwngx doek, de ndwn mbouj maenh, laemx youq gwnz namh. Seizneix, miz bouxhenj ndeu cung gvaqdaeuj vaiq lumj rumz——Ho, dwg bouxgo soengqgaicawx! De aeu aen dienhci dingz youq henz yahbuz, goengzyongq roengzdaeuj caeuq yahbuz unqswnh naeuz:“Buz gaej lau, gou soengq mwngz bae yihyen.” De doq naeuz doq fuz yahbuz hwnj ci naengh, hai ci bae yihyen.

Fwn lij doek, gavaq gou dumzdwddwd. Seizneix, gou yawjraen bouxau ndeu suk aen hoz de, fwngz cw gwnz gyaeuj, youq ndaw fwn buet. Gou yawj bouxau haenx, naemj: Bouxau gyauhgingj youq gyang fwn dazyinx vunz ci gvaq roen, bouxgo soengqgaicawx simndei soengq yahbuz bae yihyen, gou dwg mbouj dwg hix wnggai guh gijmaz ne? Daxmeh yawjok gou naemj gijmaz, riunyumnyum naeuz:“Damjlaux di, siengj guh gijmaz bae guh ba!” Gou ngaekngaek gyaeuj, beng fwngz daxmeh buet daengz baihnaj bouxau, naeuz:“Au ha, aen liengj neix ciq hawj mwngz!” Gou doq naeuz doq aeu liengj ndenq hawj de. Bouxau mbat anj ndeu, gokda cumx lo.

Gou caeuq daxmeh gang aen liengj ndeu byaij bae ranz. Daxmeh naeuz, gou ngoenzneix lumj daengngoenz iq, dawz raeujrub bouxau gyauhgingj caeuq bouxgo soengqgaicawx cienz hawj bouxwnq. Gou sawqmwh roxnyinh, couhcinj dwg ngoenzfwn, nditndat hix ciuq ndaej haeuj ndawsim raeuz.

(Lij Yinhyez raiz Lij Yanghlenz hoiz)