Banringz gvaq, rumzsaeq ci gvaq, baiz roegnganh ndeu gyaep laeng fwjhau, youq gyang mbwn louzroengz baenz raq baenz raq singhemq raezrangh. Gizgyae, daemznaz lumj aenhaij henjgim, giz rumz ci daengz haenx, couh fub hwnj langh saekgim.

Gou caeuq dahcej caij gvaq nditbanhaemh, youzbyaij youq gwnz roeniq lajmbanj. Giz mbouj gyae, gaemz doxgaiq saekhau ndeu menhmenh noddoengh. Hi, dwg fwjhau daj gwnz mbwn doek roengzdaeuj la? Dou roxnyinh geizheih couh byaij gvaqbae, fwt riuhaha hwnjdaeuj —— Haenx dwg duz yiengzlwg ndeu cingq gwn nywj! Gou lumhlumh de, de baenzneix unqnem. Gou siengj: Fwjhau gwnz mbwn wnggai hix dwg yienghneix unqnemnem ba!

Seizneix, aenrwz dingqnyi baenz raq sing hemqgaga, gou cienq ndang baez yawj, raen daxgoeng gaem diuz faexsaux, cingq gyaep gyoengq bit ndeu bae naz.

Dahcej singdaemq doiq gou naeuz: “Nuengx, raeuz bae gaeb bit ba!” Gou angq diuq hwnjdaeuj, han naeuz: “Ndei!” Gou caeuq dahcej yaemj din yaemj fwngz dwk byaij youq laeng gyoengq bit, siengj swnh gyoengq bit mbouj haeujeiq gaeb duz bit ndeu. Duzbit coengmingz lumjnaeuz nyouq daengz heiq yungyiemj nei, dou lij caengz coemj hwnjbae, couh heuhgaga dwk, mbe fwed seiqcawq mbin deuz lo. Gou gaenjgip naeuz: “Dahcej, duzbit gvai raixcaix, raeuz aeu ra dieg ndeu ndoj hwnjdaeuj, caiq‘fwt caeggaeb’！”

Gou yawjyawj seiqlengq, gohaeux ndaw naz henzgyawj ngamqngamq gvej, cij law baenz nyup baenz nyup ganjhaeux roz, gaenbonj ndoj mbouj ndaej. Gou yawjyawj dahcej, sikhaek miz cawjeiq lo. Gou gungj aenndang roengz daemq, ndoj youq laeng dahcej, yaeng’yaeng byaij. Dahcej ndaw sim roxyiuj, boiqhab gou ngamjlili, yamqdin mbaeuyebyeb. Dou siujsim lili dwk depgyawj gyoengq bit. Couh youq seiz cij liz gyoengq bit geij yamq gyae, gou daj laeng dahcej vaiqvit bongh okdaeuj, coemj coh duzbit ndang loq iq ndeu, da yawj yaek gaeb dawz duzbit lo, cix mbouj siujsim caij roengz gumzboengz bae. Doeklaeng duzbit mbouj gaeb ndaej, gou cix daengx ndang uq boengz, nyex ndaej dahcej caeuq daxgoeng riuhaha. Gou ngaem gyaeuj roengzdaeuj, yawjyawj swhgeij, hix riuhaha hwnjdaeuj.

Daengngoenz yaek doek baihsae, gou caeuq dahcej fwngz gaem fwngz, baez yamq baez yamq byaij youq gwnz roen ma ranz. Ndwenngoenz lajmbanj, caen angqyangz.

(Nez Buzyangz raiz Nungz Cinfung hoiz)