Byaij youq diuz roeniq cw rim naefaiq, langhda yawj bae, gij rum reuqroz rogdoengh hausaksak liux, lumj ngamq vanq dangzsa hwnjbae nei.

Diuz rijiq raemx sawdikdik gyoet dwk hojsouh raixcaix, vihliux hawj bonjfaenh lai miz di rengz, bienq raeujrub bae, de itloh cungj ciengq go mboujdingz. Singgo de mizseiz yiengjgugu, mizseiz yiengjvava, mizseiz yiengjdingdung, singgo bienqvuenh gij diuh mbouj doengz, caeuq doengh gij faexloeglingz、godumh youq gwnz roen bungzraen haenx doxdongx.

Gogaeu raih hwnj doenghgo hamj gvaq rijiq, nanzdauh miz vunz niuj de gvaq ha? Hawj de daengx ndang utgoz, aen ndang saeqset niuj bae niuj dauq. Gizsaed ha, dwg youq seizhah, nengzgoemj、duzmoed、noncap aeu de dangguh giuziq raih hwnjbae, loengh dwk de humz yaek dai cix mbaetheiq mbouj riu, de lau saeuj ndang le doengh duz gvaq giuz haenx doek roengzbae, cij niuj ha ut ha, ut ha niuj ha.

Ndaek rinheu damdoz liengzsangj ndeu, naengh youq gyang rij angqvauvau swiqndang. Gaej yousim, de coengzlaiz mbouj dwgliengz gvaq. Daengngoenz okdaeuj lo, raeujrubrub ne. Duz doq hozhumz ndeu okrog daeuj dak ndit, nyaujiq gyoet dwk suk baenz ndaek, ninz youq ndaek rin dak ndat haenx gyoq ndit bouj rengzndang. De dakdak baihnaj, youh dakdak baihlaeng, baenqletlet, fatok gij sing vwng vwng vwng.

Rijiq lij youq laj ndit ronghsagsag lae bae mbouj dingz, ciengq gij go bonjfaenh, yaep ndeu yiengjgugu, yaep ndeu yiengjvava, yaep ndeu yiengjdingdung…… (Siuh Dingli raiz Lij Siulingz hoiz)