Seizhah ndit ndatfwdfwd, aensim hix ndatfwdfwd. Raemxlangh ndaw haij baez dem baez nyoengx hwnj hamq haij, gienj hwnj duj valangh hausaksak.

Banhaet haj diemj cung, raemx- cauz doiq lo, gou caj mbouj gib buet bae coh daihhaij. Gwnz haij roemj miz caengz dem caengz mokmbang, mok- mbang mokmak, lumj aen dieg sien nei. Youq giz gyae haenx, geij goengq bya iq youq ndaw mok yaek raen yaek mbouj. “ Va! Dwg bang baeu ndeu! ”Gou raen duzbaeu baenz gyoengq baenz bang youq gwnz sadan vangved luenh raih, lwgda gou yaepyet couh rongh lo: Buet ha! Bae gaeb baeu!

Gou ndiengq giuj hwnjdaeuj, ndaw fwngz gaem gaem nywjhaij hung ndeu, gungj hwet, lwgda cimyawj duzbaeu, siujsim riri depgaenh de, swnh duzde mbouj roxnyinh, “ba” sing ndeu, duzbaeu iq deng goemq youq laj nywjhaij lo. Duzbaeu lij youq lwi? Gou geizheih dwk biengj nywjhaij daeuj yawj, “yu, duzbaeu lij youq bw!” Gou siujsim dwk dawz duzbaeu coq haeuj ndaw doengj bae. Ndit ciuq roengzdaeuj, raemx ndaw doengj rongh gim myanmyan, yawj gij baeu ndaw doengj haenx, ndaw sim gou gaej dwen miz geijlai angq lo! Doeklaeng, gou menhmenh cij ra raen aen banjdaeuz gaeb duzbaeu, couhdwg aeu vaiq、cinj、haenq! “Youh gaemh dawz lo! Gaemh dawz lo!” Gou hemq mbouj dingz, raen duzbaeu ndaw doengj yied daeuj yied lai, gou sim- angq dwk siengj angj hawj daengx seiqgyaiq!

Sing hemq gou hawj aen daengngoenz haeujsim gou, aen de daj mbiengj naj iq ndeu hainduj, bienqbaenz aen daengngoenz hoengz luenzlulu ndeu, ndit saekgim haenx ciuq doh gwnz deih, lumj dwg dajciengj hawj gou nei.

Langh da yawj bae, aen daihhaij lumj ndaek rinbauj seuqsak ndeu nei ndongqliklik. Gizgyae, mbwn lamz- yubyub hix yungzhab haeujbae lo, caen dwg mbwn raemx saek doxdoengz. Raemx gwnz haij rongh- yebyeb, lumj gaiq rinbauj sieng gim nei ronghmyanmyan.

Daihhaij sawdikdik, langhraemx hausaksak, daengngoenz ok gwnz haij, duzbaeu iq guhlaeuh, doengh gij neix baenzlawz mbouj dwg ranghdieg funghgingj gyaeundei ndeu ne!

(Cenz Gyahyiz raiz

Veiz Yennaz hoiz)