Haemhlwenz, daxboh daxmeh doxceng lo.

Hainduj doxndaq, gyoengqde sing hung cenghumhum, doeklaeng couh boux mbouj leixlangh boux, ndaw ranz cungj mbouj raen doenghbaez gij miz gangj miz riu doxhuz doxgyaez haenx lo. Gou dangguh gij hamh geb ndaw bingj, ndaw sim luenhcabcab.

Haetneix, gij heiq ndaw ranz ciuqgaeuq gaenjcieng hawj gou diemheiq mbouj gvaqdaeuj. Aenvih daxboh daxmeh doxceng, ngaizromh hix bienqbaenz luenhhuhu: Gyaeq- gaeq cauj baenz ndaemndat, cijvaiz hix gyoetgyatgyat.

Banringz gwn ngaiz sat, gou gietdingh roi sim daxmeh, couh daiq daxmeh bae youzbyaij. Gou siujsim yupyup caeuq daxmeh gangj：“Daxmeh, daxboh hix dwg gvansim mwngz, mwngz mbouj wnggai yiengh- neix caeuq daxboh gangjvah……”Gou lumj yied gangj yied vaih saeh, saeknaj daxmeh yied daeuj yied yak- yawj. Baez ma daengz ranz, de couh ndatheiq dwk hongz daxboh：“Mwngz gvaqmauh dahraix, baez doxceng couh hawj lwgnyez daeuj hongz gou!”

“Vanzlij mbouj dwg mwngz ceng gonq!”Gij ndatheiq daxboh doq deng diemjdawz, de naj hoengz rwz dik youh caeuq daxmeh doxceng hwnjdaeuj. Sing daxboh daxmeh yied daeuj yied hung, lumjnaeuz yaek biengj dingjranz bae nei. Gou gaenbonj gangj mbouj ndaej vah, fouznaih ndwn youq bangxhenz.

Banringzgvaq ma daengz ranz, gou yawjraen daxmeh naengh youq gwnz sahfaz yawj soujgih, ndaw uk fwt mauh’ok aen cawjceiq ndeu. Gou byaij daengz dangqnaj daxmeh, cam：“Daxmeh, ndaej ciq soujgih mwngz caz swhliu lwi?”“Dawz bae ba!”Daxmeh mbouj ngeizlaengx saek di dawz soujgih hawj gou. Gou dawz soujgih daxmeh, byaij daengz henz ndeu, laeglemx hai gij gaimen gangjgoj veihsin daxboh, hag gangjfap daxmeh fat le duenh vah ndeu hawj daxboh：“Doiq mbouj gvaq, dwg gou cungdoengh lai, mbouj wnggai doiq mwngz baenzneix yak……”Fat sat le, gou couh dawz geiqloeg gangjgoj cat lo.

Dingh—— Mbouj gvaq geij faencung, soujgih veihsin yiengj sing ndeu. Daxmeh dawz ok soujgih baez yawj, gwnz naj yienh ok saekriu. De buet haeuj ranzdajcawj, nyaengq- foedfoed hwnjdaeuj.

Gvaq le yaep ndeu, daxboh dauqma lo, ndaw fwngz lij riuj gij saejdaeuz daxmeh ceiq haengj gwn haenx. Daxmeh dingqnyi sing yiengj, daj ranzdajcawj yo gyaeuj okdaeuj, song boux lwgda doxcim, mbouj raen song boux de najhaen hozbongz lo. Daxboh ae sing ndeu, gangj：“Gou cawx le saejdaeuz mwngz haengj gwn. Mwngz ngoenzneix baeg luba? Gou bang mwngz guh saeh.”Gangj le, daxboh byaij haeuj ranzdajcawj, caeuq daxmeh itheij cawj caeuz. Gou ndoj youq baihlaeng dou, ndaw sim cungj dwg vaiqvued.

Seiz gwn caeuz, dou sam boux humx naengh youq henz daiz gwnhaeux, angq dangqmaz.

(Cwnz Yiyenz raiz

Lingz Hinghningz hoiz)