Daiq gou bineix roekcib sam bi, de ce byoemgyaeuj dinj riengz rwz. Ndwenngoenz lumjbaenz gyaez de lai, cungj cinj de bi’ndwen gvaq va’gyap, hoeng naengnoh ciuqgaeuq hauoiq, da ronghsagsag, yawj hwnjbae beij boux caemhsaemh coz haujlai lo!

Daiq ngoenz gwn yungh, mbaetyungh lumjbaenz cungj gaek youq ndaw sim de. Gwn haeux seiz, danghnaeuz gwnz daiz doek saek naed haeux, de sikhaek gip hwnjdaeuj dawz haeuj bak bae, lij riu dwk naeuz: “Gij gwn doek gwnz daiz mbouj gvaq caet miux cung cungj lij baenz gwn, mbouj ndaej sai o!”Baez lauxsae hawj dou vuenh bonj cozyez moq, daiq couh lumj boux cangh ak he, dawz bonj cozyez gaeuq gij mbaw mbouj caengz yungh gvaq de sik roengzdaeuj, yungh aendingsaw daeuj ding baenz bonj moq hawj gou.

Geiq ndaej baezhaenx, buh gou vaih congh iq ndeu, gou laihnaeuz yaek ndaej cawx buh moq lo, daiq couh baetbaet fwngz, naeuz:“Buh byoengq congh iq ndeu couh vuenh moq, hojsik lai lo, gou siengj banhfap fong de!” Gou dingq gij vah neix, bak mbit hwnjdaeuj, utheiq dwk dingj:“Daenj buh fong, ngaiz bouxwnq riu gou!”Daiq mbouj gangj vah, cienq ndang bae menhmenh dawz aen sieng bauj de okdaeuj, mbouj geij nanz couh fan ok mbaw baengz he. Gou baez yawj, mbaw baengz gwnzde siuq miz duz douq gang liengj riuj swx, doq naeuz:“Dozanq neix gyaeundei lai lo!” Daiq riuriu, gijmaz hix mbouj naeuz, cix dawz gingqda, raed gij dozanq roengzdaeuj, bu roengz gwnz congh buh vaih bae, baez cim baez cim nyib hwnjdaeuj. Gij din mae youh iq youh yinz, yawj mbouj ok maet lawz dwg riz fong. Nyib liux le, daiq mbe hai geu buh, daekeiq dwk doiq gou naeuz:“Mwngz yawj, gij buh neix gizlawz miz denh fong? Faenmingz dwg fuk doz he!”

Boux neix couh dwg daiq gou, de mbaetyungh、coengmingz youh maenh’ak, hawj ndwenngoenz bingz- ciengz roenx rim gij gyaeundei saepsoiq.

（Cangh Sihyanz raiz Veiz Yen’gyangz hoiz）