Vangz Meijyen fwt siengj daengz, “miz banhfap lo!” De sawqmwh hemqnaeuz. Liuz Fangh- fangh doeksaet, cam:“Gijmaz ‘miz banhfap’?”

Vangz Meijyen angq naeuz:“Mwngz heuh gou cam daxboh gou ra hong hawj daxboh mwngz guh, daxboh mwngz heuh ndaej bang vunzmbanj ndeu bae guh, song ndwen lai couh ndaej ngaenzhong sam fanh lai maenz, neix dwg gij goenglauz mwngz, yienghneix mwngz couh miz swhgwz heuh boh mwngz caeuq gyoengqvunz moix vunz gien song bak maenz.”

“Mbouj baenz ni.” Liuz Fanghfangh mbouj nyinh.

“Baenzlawz mbouj baenz? Mbouj miz raemxmboq baelawz miz raemxrij lae, mwngz couh dwg goekmboq.” Vangz Meijyen naeuz.

“Gou mbouj gamj caeuq daxboh gou cam.” Liuz Fanghfangh naeuz, lumj guh loek saeh nei mboujeiqseiq.

“Mwngz mbei unq lai, gou ma ranz dwk denva caeuq daxboh gou naeuz.” Coenz vah Vangz Meijyen lumj lej bauqrengh.

（Cibbet）

Ngoenzgonq fat caez cienz hawj daihgya, Cinz lauxbanj dajsuenq heuh daihgya bae Bwzhaij guh. Haemhgonq Cinz lauxbanj cingj daihgya bae bouqhaeux gwn haeux. Cinz lauxbanj gingq laeuj cenj daih’it hawj Vangz Gencingh, song vunz ndwn hwnjdaeuj, denva Vangz Gencingh yiengj lo, Cinz lauxbanj unqswnh dwk naeuz:“Ciep denva gonq.”

“Daxboh, gwnhaeux caez la?” Dwg Vangz Meijyen dwk daeuj.

“Seizneix gwn, sou gwn caengz?” Vangz Gencingh cam.

“Dou gwn gvaq, gou miz gienh saehcingz ndeu siengj cingjgouz daxboh bangcoh, mbouj rox daxboh haengj coengh mbouj?”

Vangz Gencingh riu naeuz:“Dahhung gou dwg lauxdaih ranz raeuz, gou guh daxboh hix aeu dingq ha.”

Vangz Meijyen cingqcingq gingging naeuz:“Gou caeuq Liuz Fanghfangh siengj youq gag mbanj ranz swhgeij hai aen gyadingz ranzdoegsaw ndeu hawj beixnuengx gwnz mbanj yawj. Vihneix gou daegdaengq yiengq daxboh Liuz Fanghfangh caeuq gyoengq beixnuengx de caiqlij gyoengq beixnuengx mbanj raeuz moix vunz gien song bak maenz.”

Vangz Gencingh baez dingq, daejriu mbouj ndaej, vunzlai hix dingqraen le, caem dingh mbouj oksing. Vangz Gencingh naeuz:“Mwngz dwg haepaeu! Lwgnyez gij ndei mbouj hag, bae hag gij vaih haenx.” Vangz Meijyen euq naeuz:“Gou bimoq hwnj cuhcungh lo, naeuz gou dwg lwgnyez, gou dwg cingjgouz, mbouj hawj couh suenq, naeuz gou dwg haepaeu……”（23）