Ranz caengz rongh, gou gaenq singj gvaqdaeuj. Sonhag seiqcib bi gvaqdaeuj, cungj dwg yienghneix, gvenq lo. Duiyouh le cungj gaij mbouj ndaej, cungj roxnyinh youqndwi mbouj gvenq. Hwnqdaeuj caemz soujgih, yawj sinhvwnz daengjdaengj.

Gyanghaet caet diemj, gou couh daenj haiz okdou, byaij buenq aen cung daeuj daengz gvangjcangz, haiheij lienhndang. Couh yienghneix, lienhndang、guhcaemz、 baeyouz, gij hozdung neix couh dwg gou moix ngoenz aeu guh.

Roxnyinh daengz ngamq duiyouh seizde, aen sim hoengqliuliu, mbouj rox guh maz, daengx ngoenz cungj youq mbouj baenz. Gwnz daizsaw mbouj miz geij dab cozyez daeb youq sangrwdrwd, henz rwz caiq mbouj miz gij sing hemqgigi gya’gya. Hwnjban seizde, moix ngoenz mbouj dwg hwnjdangz couh dwg bae caijfangj, cungj miz haujlai saeh bae guh, nyaengqdidi hix angqfofo, saedceij gvaq ndaej gig rimhoz. Ndaejhoengq couh caeuq bouxdaeuz, caeuq lauxsae, doxcomz gangjgoj, doxson doxhag…… Daj duiyouh le, saedceij gvaq ndaej mbwqbywdbywd, caemriri, mbouj caiq nauhyied.

Baengzyoux raen gou simfanz, couh heuh gou bae gwncaz gangjgoj, naeuz yaek ra di hong ndeu hawj gou guh. De gietdingh daiq gou bae camgya aen Sawcuengh caijfungh hozdung ndaw si. Gou gag naemj: Caijfungh couh dwg okrog bae byaijbyaij youzlangh, feiq seizgan cixbah miz maz yungh ne?

Youq duenh seizgan haenx, gou couh caeuq gyoengq baengzyoux faenbied bae daengz Dunghlanz Yen caeuq Dwzbauj Yen caijfungh. Moix daengz giz dieg moq, gou caen dwg ndaejik gig laeg, hawj vunz rwz singj da rongh. Byaij daengz gizlawz cungj ndaej yawj gij gingjsaek daegbied gag miz, hawj vunz lumj youq baihndaw fuk veh gyaeundei nei. Yawj dieg ranzmbanj gyoengqde, mwngz ndaej daejniemh daengz gij minzcuz fungcingz gyaeulili daegbied diegwnq.

Bae Dunghlanz yawj diegcoj Veiz Bazginz, ndaej dingq daengz gij gojgaeq gyoengqde gaxgonq baenzlawz guh gwzming, gamjsouh gij cingzngeih gwzming senhlez.

Youq Dwzbauj Yen caijfungh, dou youz ndoeng goraeu、baij roenmax gaeuq、yawj Cinanfuj Samdangz…… Baez daengz gizlawz, cungj roxnyinh gak cungj vwnzva vih bonjdieg gyoengqde demgya gij caw vunzcaiz naekna.

Moix baez caijfungh, gou mbouj- danh roxnaj haujlai baengzyoux, hix hawj gou gamjsouh daengz gyoengq- vunz diegwnq simhoengz gyaezhek. Daegbied dwg cimz gijgwn ndei daegsaek gyoengqde, hawj gou naengh roengz congz couh mbouj nyienh caiq byaijdeuz. Doq gwn doq dingq gyoengqde gangj gij saeh bonjdieg, nauhyied raixcaix.

Gyoengq beixnuengx doq youz doq hag, raen gij gingjsaek ndei couh ingj siengq louzniemh, geiq bitgeiq, lau roh gijmaz saeh hung ityiengh.

Byaij okbae, yawj dieg vunz, gangj goj moq, gyau baengzyoux…… Gij caijfungh neix hawj ukgyaeuj dou mizok haujlai lingzganj, hix hawj gou hag ndaej haujlai daezcaiz moq.

Caen dwg geizheih lo, daj gou camgya geij baez caijfungh hozdung le, roxnyinh saedceij gvaq ndaej gig vaiq. Gij mbwq mbouj miz lo, ndaej hoengq couh doengh bit raizraiz, miz gihvei couh guhdoih okbae yawjyawj.

Seizneix gou camgya gak cungj beizyin, hag Sawcuengh、 sij faenz- cieng, saedceij gvaq ndaej caensaed youh cungcuk.