Geiqndaej gou gvaq ngoenzseng roek bi le ngoenz daihngeih de, daxboh nyinhcaen caeuq gou naeuz: “Mwngz gaenq baenz bouxsai iq lo, daj ngoenzneix hwnj, mwngz yaek gag ninz lo.” Gizsaed, gou caeux couh siengj gag ninz lo! Siengj daengz ndaej daengjhai ninz youq gwnz mbonq, lij mbouj lau aenvih ninz mbouj ndaek ngaiz bohmeh naeuz, gou ndawsim maqmuengh dangqmaz, mbouj ngeizvaeg saekdi naeuz: “Ndaej ha, haemhneix gou couh gag ninz!”

Deq ha deq, deq daengz ban- haemh lo, swiq ndang sat, gou got duzmabaengz guhcaemz, caeuq bohmeh gangj coenz “ninzonj” , couh bi gen bi ga byaij haeuj rugninz.

Gven daeng le, daengx aen rugninz laepngaungau, gou gaenjcieng lo, sikhaek laepda dwk.“Ngi- nget——” , sawqmwh, raq singsaeq ndeu cienz daeuj. Gou ndawsim baez “yaepyaw” , dwg daxmeh haeujdaeuj loma? Hoeng gou baez dauqnaemj, mbouj deng, gou mbouj dingqdaengz sing byaij daxmeh. Nanzdauh dwg lwgcaeg? Hix mbouj deng, bakdou conghcueng cungj gven maenhcwt. Dwg vunz rogsinggiuz? …… Ndaw uk gou nyoenx ok gak cungj siengjfap. Gou mbouj gamj hai da, lau baez hai da, couh yawjraen gij cangzgingj dwglau. Gou got duzmabaengz ndaetndwd, gaemhanh swhgeij gaej caiq siengj roengzbae.

“Nyat——nyat——” Youh miz sing geizgvaiq yiengj, gou ndang saenzdedded, bwnsungz daengj liux. “A！” Gou roxnyinh miz doxgaiq bungq gou, caepcwgcwg, liengzsisi, nyaenx mbouj ndaej hemq sing hung ndeu, fwt naengh hwnjdaeuj, vaiqvid hai daeng. Gou ngaem gyaeuj baez yawj, yienzlaiz dwg din gou bungq daengz haenzmbonq lo. Gou diem gaemz heiq raezrangh ndeu: “Caen dwg gag hwk swhgeij!”

Gou gven daeng, yaeng’yaeng ninz roengz, haenqrengz sawj swhgeij ninzndaek. “Hunglung!” Sawqmwh rogcueng yiengj sing loet ndeu, diuz byajyap lwenqda bongh gvaq aen mbwnhaemh. Gou baez dawz denz goemq gyaeuj, gienj baenz gienj ndeu, daihheiq mbouj gamj ok. Seizneix, gou cij roxnyinh swhgeij sim diuqbubbub, lumj sikhaek yaek saet ok conghhoz daeuj nei. Gou mboujdingz nai swhgeij: “Gaej lau, bohmeh youq henz……” Gou singdaemq ciengq diuz fwen lox nyez ninz daxmeh ciengq hawj gou haenx: “Ninz ba, ninz ba, baujboiq ndeigyaez gou ……” Ciemhciemh, gou couh ninzndaek lo.

Ngoenz daihngeih haetcaeux, gou caj mbouj gib dawz gij ginglig gyanghwnz lwnh bohmeh nyi. Daxmeh dep rwz daengz naj aek gou dingqdingq le, gangjyinx naeuz: “Mbei mwngz fag bw!” “Haha……” Dou cungj riu lo.

(Gouj Senhyi raiz / Nungz Cinfung hoiz)