Yaek cam aen diegangq gou youq gizlawz, gou mbouj lawq saek di naeuz mwngz nyi, dwg youq ranzcoj lajmbanj Gvangjsih gyae’gyae haenx.

Ranzcoj miz faex daegbied lai. Miz go’nganx、gomakliemx、gobohloz、gomakgai、golaehcei daengj, geq hix geq mbouj liux.

Gij faex neix seiqgeiq ciengz heu, lij giet ok mak rangdiemz. Moix baez cuengqgyaj, gou ceiq muengh couh dwg ma ranzcoj lo, aenvih cijaeu ma daengz ranzcoj, yaek gwn mak couh ndaej gwn, gwn daengz imq bae, caen dwg saedyienh “mak cwxcaih” lo.

Cawz le mak lai, ranzcoj lij miz haujlai doxgaiq ndeigwn dem. Daengz seizdoeng, byaij youq ndaw reih, cungj ndaej raen baenz benq reih oij, cijaeu dongx vunzmbanj sing ndeu, gyoengqde couh riuhoho dwk raemj geij gyaengh oij soengq hawj mwngz heuh mwngz gwn. Gij oij moq neix nyaij hwnjdaeuj lij diemz gvaq dangzrwi bae! Hoeng gou ceiq gyaez gwn couh dwg yiuz lwgmaenz、yiuz duh caeuq yiuz gaeq lo. “Yiuz”dwg ranzcoj cungj dajcawj fuengsik daegbied ndeu, aeu yungh namhgaiq dap aen yiuz ndeu gonq, yienzhaeuh youq ndaw yiuz dwkfeiz, cigdaengz gaiq namh deng coemh hau. Mwhneix, youq dingj yiuz hai aen congh ndeu, dawz gij maenz、maenzmajlingz、gaeq gaj hau haenx yungh ceijsik duk ndei le dwk haeuj ndaw yiuz bae, caiq dawz gaiq namh byaeu hau haenx gvaek soiq, haem gijgwn ndei, caj daih’iek 20 faen cung, gij feih rang roenx okdaeuj couh baenz lo. Gij maenz caeuq maenzmajlingz daj ndaw yiuz dawz okdaeuj haenx youh unq youh rangdiemz, duzgaeq naeng henj byot noh cix unq, hawj vunz gwn dungx imq le bak lij ngah daengx mbouj ndaej.

Gyanghongh ranzcoj caemh gig mizyinx. Mwh ndaejhoengq, gou couh caeuq song daegbiuj namznamz、baekbaek youq gyanghongh boenq gaeq. Danghnaeuz bungz daengz gaeqlwg “deuz ok lauz”, gou couh dawz diuz faex ndeu hwnjdaeuj, gyaep de dauq rongzgaeq. Saekseiz lij youq gwnz gvih、gwnz daengq ra daengz aen gyaeq gaeqmeh ngamq ok lij raeujrubrub haenx! Baeg lo, gou couh hawj daxgoeng dawz congzduengq okdaeuj, cug youq gyang song go faex ndaw hongh, ninz youq gwnzde dak ndit, dingq rumz caeuq nywj gangjgoj.

Mbwn yaek laep, aen gvangjcangz ranzcoj gig nauhyied. Daegbied daengz gvaq cieng, gyoengqvunz lij youq gwnz gvangjcangz cuengq ienva, feizva ronghsag youh lwenqda. Codaeuz, gou cij gamj ndoj youq henz yawj. Gvaq geij ngoenz le, gou gamj depgyawj di lo. Doeklaeng, daxboh daxmeh son gou le, gou lij rox cuengq ienva dem, yawj gij eiqdaeuz nauhyied gvaq cieng youq ndaw vafeiz ronghlwenq langhhai.

Ranzcoj caeuq hawsingz cauzhuhu mbouj doxdoengz, gizneix saeuq oenq ngeungeu、gaeq haen ma raeuq, moix aen geiqciet、mwhmwh seizseiz cungj miz gij gingjsaek maezvunz. De dwg diegangq gou, dwg gizdieg ndaw sim gou ciengxlwenx gvaqniemh caeuq yaek bae haenx.

(Bwzgingh Si Cuiveih Siujyoz seiq (18) ban Bez Cunghyez raiz / Loeg Haijdaek hoiz)