Daengngoenz yaek dawz diegnywj dak ndat seiz, daekmax dajsuenq ok dou bae cunz aen ciengz langhciengx doihduz de.

De gaeuj gingq yawj, nyinhcaen dajcang swhgeij.

Soujsien, de doiq aen naj sam gak bonjfaenh gig habhoz, ngaek gyaeuj sam baez.

Daenj geu buhndaw raizgek, longz geu buhrog saekdaep, geu buhrog bien buh dwg saek heu oiq, gig ndeiyawj.

Baihnaj baihlaeng baihswix baihgvaz, cienq bae cienq dauq yawj, doeklaeng, daekmax couh ndiengq byaidin, doiq swhgeij daengj mehfwngz: W, gou dwg daekmax baenzmbauq!

Yienghceij daekmax, lumj boux sonsaw sienseng ciuhgeq, de menh byaij okbae lo.

Siengj mbouj daengz dangqnaj bungz daengz bang vunzbag ndeu, gyoengqde siengj dawz boux sienseng dajcang ndaej cingjcingj caezcaez haenx loengh baez ndeu. Gyoengqde aeu faex bae gyongz de, dawz rin iq gveng de, daekmax cungj ndoj deuz. Daekmax daengx da doeksaet yat, mbouj rox swhgeij vihmaz mbouj ndaej gyoengqvunz haenx gingqcungh.

Vihliux sawj gyoengqvunz moegdoeg haenx doiq laeng, daekmax cijndaej hai gij bonjsaeh ceiq maenh’ak de okdaeuj, dawz song cik ganaj gutgungq youq dangqnaj aennaj sam gak de, hwkhag doiqfueng. De youh roengzrengz ndwj song da, lwgda mbotmbatmbat ndaej hwk vunz lau daej bae. Doeklaeng, de lij fwt ndwn soh hwnjdaeuj, hawj swhgeij bienq sang, bienq hung. Youq mwh de ndwn mbouj onj, vanzlij caenhrengz ca namh, buekmingh dingj dwk.

Daj gizgyae yawj bae, daekmax gaenq bienq ndang baenz duz ngwzhab hozndat ndeu lo.

Va! Hw! Aiya!

Gyoengq vunzyouz sup gaemz heiq nit ndeu, couh doiq dauqlaeng bae lo.

Gyoengqde doiq daekmax gangj cijcij cetcet, song din cix yied doiq yied gyae lo.

Caj gyoengq vunz haenx mbouj raen ngaeuz lo, daekmax sou nyaujnaj hung de dauq, cingjleix buh ndei, ndaengndiengq dwk maenjhwhw naeuz:“Gou daekmax ngoenzneix yungh coengmingz haep deuz vunzloih, mboujguenj gyoengqde hung gvaq gou haujlai boix bw! Coengmingz dwkbaih manzgyaengq lo.”

Couh baenzneix guh, daekmax dauqcungz menhmenh byaij, simdingh cwdcwd yawj aen ciengz langh doihduz de. Dieg bo langh doihduz de, nywj heuswdswd, va gyaeugetget. Youq ndaw caz rum, buhndaw raizgek de, youq ndaw buhrog saekdaep haenx yaepmyanmyan.

(Veiz Cwngzgij hoiz)