Ndwensam ndawco ngoenz ndeu banringz gvaq, dahcej daiq gou bae ndaem “cin”.

Yawj gij ceh naed iqnyaeq vadaengngoenz, gou ngawzngwd cam:“Naedduh youh iq youh yakyawj neix gingqyienz dwg ‘cin’?” Dahcej riu naeuz:“Cih‘cin （春）’Sawgun, giz ceiq youqgaenj de couh dwg cih ‘ngoenz（日）’，cih saw neix daengngoenz youq ndawgyang, faex rum homz henz de majfwngfwng. Vunz ciuhgeq gangj, yawj go rum ndeu couh rox seizcin daengz, couh dwg aen dauhleix neix.”

Gou caeuq dahcej daeuj- daengz baihlaeng gyanghongh, senj bae senj dauq, senj le gaiq dieg namh biz ndeu. Dou aeu fwngz saiq namh, yaek hawj aen ranz gij ceh iqnyaeq gvangq di. Gou dawz naedceh yaengyaeng vanq youq ndaw geh namh, dahcej youh yungh caengz namh mbang ndeu goemq gwnz de. Gou cimyawj gaiq dieg haenx, mbouj siengj lauq gvaq yaep vadaengngoenz did ngaz ndonj gyaeuj ok naj namh haenx.

“Yaek gvaq geijlai nanz gyoengqde cij ndaej did ngaz ne?”Gou yawj gij namh cw naed ceh haenx fat mwnh.

“Mwngz yawj, vunz ciuhgeq lwnh raeuz lo, mbiengj baihgvaz cih ‘cin （春）’, dwg mbouj dwg lumj go ngaz oiq ndeu ngamq mauh ok gwnz diegnamh bingzbwd daeuj? Majhung caeuq ganqciengx aeu naihsim cajdeq bw.”Dahcej nai gou.

Caj ha caj ha, yaep da gaenq dwg sam nyied ndawcib, sawqmwh da raen miz di heuoiq ndeu con ok namh daeuj. Gou boemz youq ndaw reih, sijsaeq cimyawj gyoengqde:

Gij heu haenx baenz go baenz go maj daemqdetdet, hoeng cungj ngiengx gyaeuj, lumjnaeuz yaek ndenq coh daengngoenz gwnzmbwn nei. Laxlawz, neix couh dwg gyoengqde vih maz heuhguh vadaengngoenz. Ndawde go oiq ndeu, maj gij yiengh couh lumj cih ‘cin（春）’, dingj di ngaz caix ok namh daeuj, caeuq ndit doxumj!

Angq dahraix, dou ndaem ok seizcin lo!

(Hoz Yizsu raiz / Lingz Hinghningz hoiz)