Lij Danenz mbouj fug, naeuz:“Hong dwg daihgya bau, vihmaz heuh gou hai ngaenzhong cib ngoenz neix?” Vunzlai caez naeuz dwg mwngz fucwz heuh dou daeuj, dwg mwngz gag guhcawj bae cawx gij nizswjfwnj yaez daeuj guhhong, oksaeh lo, mwngz doi hawj daihgya, dauhleix gangj mbouj doeng.

Lij Danenz mbouj miz vah gangj lo, siengj deuz, deng ngeihcib boux vunzmbanj humx ndaej ndaetfwdfwd.

Daihgya youh naeuz, dwg mwngz gangj guh doengh daihlaeuz neix moix bingzfuengmij ndaej maenz ndeu, dou suenq gvaq, ngoenz ndeu ngaenzhong ndaej song bak hajcib maenz, seizneix mwngz couh hawj dou ngaenzhong ngoenz song bak hajcib maenz, daj ndwen gonq dou riengz mwngz guh laeuzsijsaw hainduj suenq.

Lij Danenz baez dingq, ngeihcib haj boux couh deng cib fanh haj cien maenz, de doeksaet yaek dai, naeuz:“Gou nyouh naemq lo, hawj gou okbae oknyouh gonq”.

De yamq ok bakdou, lumj duznou nei saet roengz mbaeklae deuz lo, gyoengqvunz fouznaih, miz boux ndeu naeuz:“Cib lai ngoenz neix raeuz daeuj neix guh mbouj dwg guh ndwi?” Lingh boux vunz naeuz:“Baenzlawz guh ndwi? Baema gyaep de aeu!”

（Cibhaj）

Banhaemh, Vangz Gencingh caeuq gyoengq vunzmbanj souhong ma ranzco, raen itlaeuz dou hai, Vangz Gencingh haeuj bae yawj, cij lw gyaqcongz, vunz deuz caez, ngeihlaeuz hix hoengqhanghang. Vangz Gencingh dwk denva hawj Cinz lauxbanj, Cinz lauxbanj dwk hawj Lij Danenz, gvengih, lienzdaemh dwk haj baez cungjdwg gvengih, Cinz lauxbanj hozndat, gvaq le cibhaj faen cung, Cinz lauxbanj dwk hawj Vangz Gencingh, naeuz:“Vangz saefouh, mwngz ra ndaej vunz mbouj? Bang gou ra cibgeij boux vunz daeuj conx gij hoiciengz cibroek doengh, ngaenzhong ngoenz ndeu song bak hajcib maenz”.

Vangz Gencingh naemj daengz dahhung Vangz Meijyen naeuz gvaq dah doengzhag de coengh daxboh de cam miz hong guh heuh daxboh de bae guh, Vangz Gencingh dwk denva bae ranz hawj dahhung naeuz miz hong guh lo, daxboh doengzhag daeuj mbouj? Vangz Meijyen dingq le angqfwngfwng, mbouj miz denva hauhmax doengzhag, song mehlwg couh byaij bae laeng doengzhag.

Mbanjliz caeuq Mbanjliuz doxliz bet leix roen, song mehlwg buetbuet byaijbyaij daengz Mbanjliuz ranz dah doengzhag, Vangz Meijyen youq baihrog hemqnaeuz:“Liuz Fanghfangh!(19)