Sai:

Gvaq cib rungh gouj dat,

Mbouj bungz makbizbaz,

Gvaq cib lueg gouj bya,

Mbouj bungz va hai moq.

Mbwk:

Ngeih sam nyied baenaj,

Mbaj dangq duz dangq mbin,

Ngeih sam nyied lajdin,

Mbouj ndaej ninz donq gaeuq.

Sai:

Gvaq cib bya gouj rungh,

Mbouj bungz valaehcei,

Gvaq cib mbanj gouj hei(haw),

Mbouj raen youxndei gvaq.

Mbwk:

Ngeih sam nyied doxbae,

Hong reih gaiq dem gaiq,

Doek gyaj youh doek faiq,

Nanz ndaej byaij okrog.

Sai:

Nuengx caiq nyaengq cix nyaengq,

Naengh roengzdaeuj eufwen,

Ngoenzngoenz go cungj dwen,

Mbouj raen mwen(nuengx) okrog.

Mbwk:

Ngeih sam nyied baenaj,

Ndaem cien haj haeuxyangz,

Ngeih sam nyied coh gyang,

Haeux sang hong engq nyaengq.

Sai:

Ngeih sam nyied mbwn raeuj,

Nuengx haeujsim ndaemndai,

Danghnaeuz hong nyaengq lai,

Go laeh vaiz bae coengh.

Mbwk:

Ndaem haeux caiq ndaem oij,

Hong hoij laj hop gwnz,

Miz go daeuj bangfwngz,

Hwnzngoenz ndaej fwendoiq.

Sai:

Ngeih sam nyied va hai,

Vunzlai bouxboux nyaengq,

Seizcin guh mbouj daengx(dingz),

Seizsou caengh(cij) miz ngaenz.

Mbwk:

Ndaem mak youh ndaem gva,

Daihgya gag dajsuenq,

Nuengx miz go daeuj buenx,

Onjsim bae guhhong.

Sai:

Ngeih sam nyied rumz raeuj,

Gohaeux goduh sang,

Aen biengz raeuz bingzan,

Vunzmbanj bouxboux angq.

Mbwk:

Ngeih sam nyied rumz raeuj，

Gohaeux goduh sang,

Lajmbanj saedceij van,

Ranzranz angq gvaq ciuh.