Vunz baez bungz guh saeh mbouj baenz seiz, dingzlai vunz cungj haengj danq coenz vah neix：Ai！baezneix youh dwg vuengzgim bienqbaenz danqaeuj lo！Gangj daengz “vuengzgim bienqbaenz danqaeuj” coenz vah neix, baihndaw miz aen gojgaeq ndeu.

Gaxgonq miz ranz vunz ndeu miz song dah lwg, dahhung haq bae ranzfouq, dah’iq haq bae ranzgungz, ndaw ranz seuqsaksak. Miz ngoenz ndeu, dahnuengx mbouj miz haeux roengz rek cawj lo, couh riuj aen daeh bae ra dahcej. Dahcej doiq dahnuengx naeuz：“Mwngz cien gungz fanh gungz, baezlaeng mwngz aeu gijmaz daeuj boiz gou？Mboujnex, mwngz gip duznaenz gwnz gyaeuj gou roengz daeuj liux bae gonq, gou couh hawj di haeux ndeu hawj mwngz baema la！” Dahnuengx ngeixngeix, raen mbouj miz banhfap le couh bang dahcej ra duznaenz. Ra ndaej duz ndeu youh cuengq youq ndaw fwngz bae hawj dahcej. Ra ya ra, daj banhaet ra daengz banhaemh, ra liux le, dahnuengx naeuz aeu haeux baema. Byawz rox, dahcej haxbaenh yo duznaenz ndeu youq ndaw ribfwngz swhgeij, seizneix de couh gyajcang cuengq fwngz hwnj gwnz gyaeuj bae nyaujnyauj, yienzhaeuh dawz daeuj doiq dahnuengx naeuz：“Mwngz yawjyawj, mwngz caengz ra ndaej liux, gou mbouj hawj haeux hawj mwngz！” Mbouj miz banhfap, dahnuengx cij- ndaej dawz aen daeh hoengq ndeu naiqnueknuek dauqma.

Byonghroen, dahnuengx raen miz duzngwz ndeu raih youq baihnaj, dahnuengx couh byaij gvaq baihswix bae, duzngwz hix raih gvaq baihswix daeuj, dahnuengx youh byaij gvaq baihgvaz bae, duzngwz hix raih gvaq baihgvaz bae. Dahnuengx raen yienghneix le, couh doiq duzngwz gangj：“Mwngz gaej daeuj lanz roen gou lai lo, gou seizneix dungx iekngaungau, lwg gou lij caj gou bae- ma cawj haeux hawj gyoengqde gwn ne, danghnaeuz mwngz hojlienz gou, mwngz couh ndonj haeuj ndaw daeh gou daeuj hawj gou baema cawj hawj lwg gou gwn.” Caen dahraix, duzngwz neix gig dingq vah dahnuengx, birieng leujleuj couh gvaigvai ndonj haeuj ndaw daeh bae.

Ma daengz ranz, dahnuengx ronq duzngwz lumj baenz aen baenz aen yienzbauj daeuj cawj. Caj de cawj cug le, geij boux lwg gaenq ninz ndaek lo, de couh aeu vaeq goemj youq gwnz daiz ce hawj lwg gwn. Haet daihngeih, caj lwg de ninz ndiu le heuh gyoengqde dawz daeuj gwn, baez gwed vaeq hwnjdaeuj, cij raen buenz gim henjrwgrwg ronghsagsag ndeu youq gwnz daiz. Dahcej de rox gienh saeh neix le, hix bae aeu duzngwz ma ciuq yienghneix guh, hoeng haet daihngeih cix bienqbaenz danqaeuj. “Vuengzgim bienqbaenz danqaeuj” coenz vah neix couh daj gizneix daeuj lo.

Bouxgeq ciengzseiz gangj：Boux gungz hix rox miz, boux miz hix rox gungz；boux bang boux cix ak, boux hangz boux couh nyieg. Ndigah, raeuz gyoengq beixnuengx aeu doxbang、doxndiep、doxgyaez gvaq saedceij cijndaej. Gaej caiq hawj “vuengzgim bienqbaenz danqaeuj” lo.