Baez rumz fiufiu mbin gvaq, baetbeuj geij mbaw faex henj, lumjbaenz naeuz hawj raeuz:“Seizcou daengz lo!” Saek cou ranzhag couh lumj fuk doz gyaeundei ityiengh, engq dawz gij yiengh gyaeu daegsaek de okdaeuj.

Youq ndaw fuk doz neix, mbaw faex loenq lumjbaenz caengz damj unq, beiq youq gwnz dieg ndoq. Gij yiengh hoengz unq raeujfwdfwd, lumjbaenz naeuz hawj vunz de dwg yiengh sengmingh feiz labcuk, de yienznaeuz myox, hoeng de geng ak, couh lumj gij mbaw faex loenq nei, bienqbaenz bwnh seizcin dwk va.

Seizcou ndaw ranzhag, mak baenz laidaih. Youq gwnz loh suenva baihlaeng, heiq mak homfwdfwd gig nyex vunz maij. Moix baez gou gvaq suenva baihlaeng, cungj nyaenx mbouj ndaej laep da, sup baez heiq naek ndeu, lumj nyi miz sing go ndei youq henz rwz, gij heiq mak homfwdfwd couhdwg soundaej, hixdwg maqmuengh.

Seizcou ndaw ranzhag, cix- dwg go faexcoengz sangrad. Mwh gaiqlai faex cungj ngaiz rumzcou nyoegnyamx, cijmiz go faex- coengz daengj maenh mbouj ning, vanzlij aemq mbaw loeg gyaeundei lumj nyawh rim ndang mwncup. Couhcinj de ndangdaej mbouj maengh, hoeng de youq ndaw heiq nit seizcou, hix lumj boux vunzloet ityiengh, dang gou rub lumh gij mbaw soem lumj cim de seiz, hix ndaejdaengz ligliengh laidaih.

Seizcou ndaw ranzhag, baenzlawz ndaej lumz geij go faexgveiq ne? Gyoengqde yungh baenz nyoemq baenz nyoemq va’gveiq gyaeundei youh hom- fwtfwt daeuj sijveh gij henj gij fag seizcou, lij simdingh cwdcwd sijveh gij saeh iqnyaeq seizcou. Seizcou dwg mbanjranz gyoengq- de, gyoengqde engq dwg eiqsei seizsou.

Yienznaeuz seizcou deng beij guh mbaw loenq、siliengz caeuq doxbiek, hoeng ranzhag gij mbaw loenq、gij mak baenz、go faexcoengz sangrad caeuq go faexgveiq heiq hom vunz maij haenx, caemhcaez baijok seizcou gij daegsaek vunz maij.

Seizcou ndaw ranzhag, dwg gyaeundei, dwg fung fag, dwg engq ak, engq dwg sim’angq.

(Cwnz Gaijyauz/raiz

Veiz Yen’gyangz/hoiz)