Youq seizcin, miz ngoenz he banringzgvaq, raq fwncin ndeu doeksasa sat le, ndaw lueg ronghsien moqsak.

Ngamq doekfwn sat, gij yiengh ndaw lueg, hawj gou roxnyinh cwxcaih raixcaix. Ndaw hoengheiq seuqset mbaeqmbet haenx, sanqfat ok heiq- namh rangfwdfwd, couh lumj gij gahfeih ngamq cawj ndaej nei, gij heiqhom de riengz laeng diemheiq sup haeuj ndaw ndang bae, youh get youh swnh, sawj gou maez youq ndawde fizfwdfwd.

Gou ngiengx gyaeuj ngonz mbwn, vengq mbwn osumsum ndeu cik haeuj lwgda daeuj, baenz geu baenz geu fwjhau youq byonghmbwn fouzfedfed, fwj mbangmbengmbeng, yinzsisi bu dwk: Miz mbangj lumj benq sujbaqsa nei mbaeumbengmbeng, miz mbangj lumj gij faenjdajcang gwnz naj lwgsau nei mbangmbingmbing, lij miz mbangj couh lumj gaiq couzhau ndeu bingz- cupcup……

Gou laebdaeb coh baihnaj byaij bae, sawqmwh yawjraen ndaw caznywj miz benq “vanae” he ronghsag, byaij gyawj sijsaeq yawj, yienzlaiz dwg nyoemq vahndoi saekhau ndeu cingqcaih hai dwk hoenghhwd. Doek fwn gvaq, gij raizcaw gwnz mbawloeg sawdikdik, daengngoenz ronghmyig- myig. Dujva saekhau haenx di cungj mbouj uq, lumj vanae ityiengh cinghseuq, langhhai youq ndaw mbaw heuseuseu haenx, yienj ndaej sang- nengneng. Raq rumz he ci daeuj, gyoengqde youq ndaw rumz bibuengq ngauznged, fizfwdfwd yiengjsouh gij rumzseuq liengzseuseu neix.

Mbouj rox seizlawz, mbouj rox gizlawz, sawqmwh yiengj ok sing roeg ndeu daeuj, sepsadsad gig ndeidingq. Sien dwg sing ndeu, caiq song sing, ciemhciemh yied daeuj yied lai, gwnz faex seiq hamq, ndaw byonghmbwn, sing roeg heuhciuciu mbouj dingz mbouj duenh. Gyoengq roeg mwngz ciengq coenz gou eu coenz, gyoebyaem ndeiriri, gapbaenz raq fwen habciengq ndeu.

Gwnz mbawfaex go faexhung haenx venj rim raemxcaw sawdikdik, bibuengq yaek doek, youq laj baih- ndit, ronghcingcing lumj rinbauj ityiengh. Nditndat con gvaq geh mbawfaex, raizraiz vava set roengz gwnz diegnywj, seiqhamq caemrwg- rwg, doxhuz doxndei.

Doek fwn gvaq le, mbwn’o、fwjhau、byaheu、faexloeg、nywjheu、vabieg、roegiq……Caen lumj mbaw veh raemxmaeg ngamq veh baenz ndeu, gou daengx ndang seizneix cungj cimq youq mbaw veh neix sim fizfaengfaeng.

(Gvanj Yijdungz / raiz

Yinj Fuzgen /hoiz)