Hanzgyaj daengz lo, gou yaek hawj mehdaiq “doeksaet angq” baez ndeu —— “Fwt ma daengz” ranz meh- daiq. Youq gwnz roen, gou lumj loq fangzhwnz nei ngeix mwh mehdaiq raen naj gou le gij yienghnaj doeksaet angqyangz de.

Ngoenz daihngeih, seiz daengz ranz mehdaiq, de cingq rwed va. Gou buet- bongh gvaqbae, got de:“Gou daeuj lo!” Mehdaiq sien ngawh yaep he, ciep dwk da hoengz raemxda conh lo, gou ganjnaeuz de gamjdoengh lai, byawz liuh daengz de dauq lumj laeq lwgnyez deng utheiq gwnvei nei nam dwk: “Guh gijmaz mbouj caeux di lwnh hawj gou naeuz yaek dauqma?” “Gou yienghneix guh mbouj dwg lau mwngz sien bwh yienghneix yienghhaenx, dwgrengz lai ma?” Gou got de engq ndaet naeuz. Mehdaiq gwnz naj saetmuengh liuxliux, “yienghneix fwt dauq ranz, mbouj ngamj, mbouj ngamj……” De doq ngauz gyaeuj doq bak bongz naeuz, “sou caeux aen singgeiz ndeu lwnh hawj gou naeuz yaek dauqma, gou couh ndaej angqyangz aen singgeiz ndeu, sou caeux ndwen ndeu lwnh hawj gou naeuz yaek dauqma, gou couh ndaej angqyangz ndwen ndeu gonq……”

Dingqnyi mehdaiq baenzneix raemhgangj, gou cij roxnyinh, baez “fwt ma daengz” caemh mbouj hawj de doeksaet angq, dauq hawj de siengsim, ienqhoij caeuq nyapnyuk saek rim dungx gou, sawj gou hix riengz dwk miz di nanzgvaq. Yaep haenx, gou mbouj rox baenzlawz nai mehdaiq, ndaw sim naemj doiq mbouj gvaq mehdaiq, ndaw hoz lumj miz ndok gaz nei, hawj gou mbouj rox baenzlawz guh. Mehdaiq rox gou mbouj ndei eiqsei, riu naeuz:“Mbouj youqgaenj da! Gij saedceij gou ngoenzngoenz cungj bingzbingz ciengz- ciengz, ngoenzneix hix suenq miz doeksaet angq, dauq dwg mehdaiq damsim di, siengj caeux di rox sou dauqma, yienghneix gij saedceij miz feih miz muengh haenx couh lai raez di.” Dingqnyi doenghgij vah mehdaiq neix, gou loq gamjsouh daengz gij doggyax de, gou hainduj mingzbeg lo, gyaez mehdaiq mbouj dwg gij doeksaet angq gou nyinhnaeuz haenx couh gaeuq lo. Ndaw sim naemj doiq mbouj gvaq mehdaiq lumj nyaij ndwnj makmoiz heu nei rim dungx rim uk cungj dwg soemj sot saep sat, soemj ndaej naj nyaeuq, saep ndaej haiz biq.

Seizde, mehdaiq raen gou najsaep mbouj angq, ganjvaiq rag gou haeuj ranz, dawz ok mbabwt gou ceiq haengj gwn. Couh yienghneix, gwn gvaq mbabwt vanswd, raen gvaq mehdaiq miz gangj miz riu, ndaw sim gij saetlaex doiq mbouj gvaq mehdaiq haenx cix menhmenh siu lo.

Baez ndaw sim fwt raen doiq mbouj gvaq mehdaiq neix, hawj gou rox lo, gyaez mbouj dwg gag nyinhnaeuz ndiep bouxwnq, gyaez dwg roxyiuj sim’eiq doiqfueng! (Youz Yijhanz / raiz

Huz Bangjhangz / hoiz)