Haeujhaemh, vunzmbanj haeuj laeng Vangz Gencingh cam aeu geijlai boux vunz bae guhhong. Vangz Gencingh naeuz:“Aeu ngeihcib haj boux, bouxlawz ndaej bae gonq haetcog couh riengz gou bae.”

Miz hong guh le, daihgya angqfwngfwng, youq ranz nanz le, mbouj miz ngaenz yungh, simfanz dangqmaz, miz mbangj gaenq ok bae dieggyae ra hong guh, ndaejnyi Vangz Gencingh miz hong guh, sikhaek ma ranz, ndawmbanj miz cibhaj boux haetcog ndaej caeuq Vangz Gencingh bae Namzningz, vunz youq dieggyae ma haenx daengz Namzningz caengh dwk denva hawj Vangz Gencingh.

Gyoengqvunz gag baema ninz le, dahhung Vangz Meijyen yaek ninz ndaek youh hwnq congz byaijok rug swhgeij daeuj daengz gyangdangz doiq Vangz Gencingh naeuz:“Daxboh, dah doengzhag gou daengq gou cam mwngz seizlawz miz hong guh le hawj daxboh de caeuq mwngz bae guh.”

Vangz Gencingh riunyumnyum doiq dahhung naeuz:“Baenz ha,baezlaeng gou ra ndaej hong gonq.”

Cib

Dieghong youq henz dijyuzgvanj, Cinz lauxbanj youq henzgyawj co ranz hawj gyoengq hujgeiq youq. Vangz Gencingh dwk denva hawj Cinz lauxbanj, aeu ndaej denva boux- cawjranz, dwk gvaqbae naeuz yaek naengh geij camh cigunghgyauh, banringzgvaq caengh daengz diegyouq.

Neix dwg seiq caengz laeuziq, cawjranz dwg boux vunzcungnienz ndeu, ganghyeu, de baez raen Vangz Gencingh, lumj lauxyoux lai bi raennaj nei byaij gvaqdaeuj, iet ok fwngzgvaz caeuq Vangz Gencingh gaemfwngz.

“Lauxbanj singq maz?” De cam.

“Gou singq Vangz.” Vangz Gencingh han.

“Gou singq Vuj, caeuq Vuj Cwzdenh doengz singq.” Cawjranz naeuz.

Vangz Gencingh riu naeuz:“Dou ndaej caeuq vuengzdaeq doengz youq, dou bingzan mbouj you lo.” Vunzlai caez riu, riengz cawjranz haeuj ranz bae.

Cawjranz hai douhung, naeuz:“Hwnj caengz daihsam、daihseiq bae, caengz daih’it caeuq daihngeih gaenq miz vunz youq lo.”（13）