Gou dwg vunz Bouxgun, gangj Vahgun. Gou mbouj rox gangj Vahcuengh, hix mbouj rox saek di Sawcuengh. Hoeng, gou guhhong yungh daengz Sawcuengh, ndigah couh haihij hag Sawcuengh, hag ndei le cij ndaej son lwghag. Yienghneix, gou couh daeuj daengz Gvangjsih Minzcuz Dayoz hag Sawcuengh lo.

Bi 2013 cuengq sujgyaj, gou daeuj daengz Minzda hag Sawcuengh, seizhaenx dwg hag Sawcuengh cogaep. Gou aeu aen fuengfap hag Yinghyij bae hag Sawcuengh——Aeu doegfap sawgun bae biu yaem Sawcuengh. Caj gou menhmenh rox bingq rox doeg liux, gou roxnyinh Sawcuengh caeuq bingqyaem sawgun doxdoeng, cij dwg eiqsei mbouj doengz. Gou rox bingq Sawcuengh liux, couh haenqrengz hag Sawcuengh. Youq Minzda doegsaw 17 ngoenz, roengzdangz lo cungj mbouj yietnaiq, doeg Sawcuengh mbouj dingz, mbouj rox couh cam vunz. Ma daengz ranz cawz liux gwn haeux、ninz, gizyawz cungj dwg hag Sawcuengh. Yienghneix, 17 ngoenz, gou doeg geij bonj saw Vahcuengh Minzda fat haenx song baez, doeg《Sawcuengh 900 Gawq》haj baez. Bihaenx, gou gauj ndaej mbaw cingq Sawcuengh cogaep.

Bi 2014 sujgyaj, gou youh ma daengz Gvangjsih Minzcuz Dayoz hagsib Sawcuengh. Mbatneix gou sim hoengzhwdhwd yaek aeu bauq gauj Sawcuengh gaugaep. Hoeng, seizhaenx boux hag Sawcuengh lailai, gou deng faen haeuj aen ban Sawcuengh cunggaep bae. Bonj saw cunggaep caeuq bonj saw gaugaep mbouj doxdoengz, gou youh dwg bauq gauj gaugaep, baenzlawz guh ne? Gou youh haenqrengz hag Sawcuengh lo. Lauxsae son doeg, gou riengzlaeng doeg, doengzhag doxson, roengzdangz lij mbouj yietnaiq, cijmiz lai doeg cij geiq ndaej maenh. Aenvih gou dwg gangj vah Sinhminz, hag Sawcuengh beij vunz dwgrengz.

Gou ciengzseiz lai cam Luz Yungjbinh lauxsae, lauxsae raen gou gyaez hag Sawcuengh, gangj:“Mwngz yienghneix gyaez hag Sawcuengh, ndaej baenz boux lijlun’gyah.” Gou ngawhngwnh, de couh gaijsiz naeuz:“Mwngz rox gangj vah Sinhminz, rox Vahgun, rox Vahcuengh, youh maij doengh’uk, dawz geij coenz neix giethab hwnjdaeuj yenzgiu, ra ok coenzvah doxdoengz, mwngz couh dwg lijlun’gyah lo.” Sat liux, de youh gangj:“Mwngz hag ndaej baenz ndei, sij ndaej baenz faenzcieng.” Dingq liux coenzhauq lauxsae, gou engqgya miz saenqsim hag ndei Sawcuengh lo.

Bi 2014 sujgyaj hag liux 17 ngoenz Sawcuengh, gou hwnzngoenz doeg Sawcuengh, dawz bonj saw cunggaep gaugaep cungj doeg liux 3 baez, lij ngoenzngoenz raiz Sawcuengh. “Vunz gaenx mbwn cix bang.” Gou gauj ndaej gaugaep lo.

Seizneix, gou youh daeuj daengz Gvangjsih Minzcuz Dayoz hag Sawcuengh. Gou aeu hag ndei Sawcuengh, guh daengz cuengh gun giethab, aeu cuengh coi gun, cuengh gun doxdoeng, cienzswnj vwnzva Cunghvaz Minzcuz.