Lajmbwn gvangq daiq lai,

Cienz seiqgyaiq,

Guekgeiz lai lumj fwj,

Dawz lajmbwn byaij doh,

Raeuz guekcoj,

Guekgeiz goqlai (ceiqlai) hoengz.

Raeuz Cungguek guekgeiz,

Hoengz baenz feiz,

Couhseih geizhajsing,

De vih raeuz lwgminz,

Caux vuenyungz,

Lumjdoengz(lumjbaenz) aen fapbauj.

De mbin hwnj gwnzmbwn,

Bienq daengngoenz,

Ciuq ndaej mbwn engq rongh,

Hwnzngoenz cungj ityiengh,

Gak beixnuengx,

Sim rongh ndang youh raeuj.

Mbwn rengx ndi roengz fwn,

Geiz ingj mbwn,

Roengz fwn haeux fungcanj.

Mboujlwnh singz rox mbanj,

Cien fanh ranz,

Ndi fanz miz dungx iek.

Guekgeiz cap ndawmbanj,

Ranzlaeuz sang,

Doengz rangzcin fouzsoq,

De hawj raeuz guekcoj,

Vunz bouxhoj,

Hai lohfouq duetgungz.

De naengh ruzroxmbin(yijcoufeihconz),

Youq gwnzmbwn,

Hairueng(haifwz) ndaem fangzhwnz,

De naengh ruzmboujninz(cenzsuijdingj),

Hwnz rangh ngoenz,

Daejhaij baenz giemqbauj.

Guekgeiz mbin benhfangz,

Simhaemzlangz,

Yawjraen damj cungj dek,

Rumzlaux geiz mbouj lot(sieng),

Raeuz Cungguek,

Onj doengz diet rangh gang.

Guekgeiz youq yozyau,

Lauxsae hau(ndei),

Vih guek caux vunzcaiz,

Gohyenz fatmingz lai,

Lumj rangzfaiz,

Baiz beij baiz engq sang.

De naengh cigauhsuz(riengjret),

Ciengq guekgo,

Byaij doh cienz seiqgyaiq,

Cingzngeih dujva hai,

Cien fanh daih，

Bauj seiqgyaiq doxhuz.

Baengh dangj dazyinx ndei,

Raeuz guekgeiz,

Caiz(cij) meiz(miz) vei(vi) miz sinq(saenq),

Dangj youq raeuz ndawsim,

Dwg mouxcin(daxmeh),

Fanhdaih lumz mbouj ndaej.

Cukhoh raeuz guekgeiz,

Daj seizneix,

Bei(bi) beij bei engq moq.

Miz dangj daeuj dazloh,

Raeuz guekcoj,

Itdingh rox fouqgiengz.

Dangj doiq raeuz ndei lai,

Raeuz fanh daih,

Aeu lailai gyaez dangj,

Gaenjriengz Gungcanjdangj,

Doengzsim ganq(guh),

Dawz namh lienh baenz gim.