Banhaet, gou cingq vuenh haiz, caepcawq bae ranzhag. Daxmeh buet gvaqdaeuj, naj ndingcik, gip dwk cam:“Linzlinz, raen aen gingqda gou lwi?”

“Daxmeh, mbouj raen!” Gou doq vuenh haiz doq naeuz.

“Aiya, gingqda gou daengz gizlawz bae la?” Daxmeh yawj ranzding yawj bae yawj dauq, mbouj rox baenzlawz guh cij ndei.

Gou yawj le yawj cung, gaenq caet diemj samcib faen lo! Gou gaeu gaeu gyaeuj, coi de:“Vaiq di, cungj yaek daengzgvaiz lo!”

Daxmeh youh gaenjgip buet haeuj ndaw rugsaw bae. Gou ganjgaenj duet haiz, buet haeuj ndaw rug daxmeh bae, bienj hwnj aen swiz, mbouj miz gingqda; raghai aen gvihgyaeujmbonq, hix mbouj miz gingqda!

Gou buet daengz veiswnghgenh, gwnz daiz swiqnaj mbouj miz, gwnz gaq cuengq doxgaiq laeng dou hix mbouj miz.

Youq mwh gou gipgip muengzmuengz buet ok veiswnghgenh, simdiuq lumjnaeuz gaenq gyavaiq lo. Gou buet daengz gwnz yangzdaiz, raghai aen fa sijyihgih, youq baenz dong buh luenhyagyag de luenh fan, ciuqyiengh mbouj raen gingqda.

Seizneix, gou najnding liux, gip dwk caemqdin. Gou ngiengx gyaeuj yawj le yawj cung, gaenq caet diemj seiq- cib lo, cij lw ngeihcib faen cung lo! Gou simgip ngeix daengz:Lij miz aen rug lawz caengz ra?

“Linzlinz, ra ndaej gingqda luma?” Daxmeh youq ranzsaeuq hemq naeuz.

“Mboujcaengz!” Gou uet hanh, naeuz:“Bae ba, gaej ra lo, gou yaek daengzgvaiz lo!” Gwnz bak gou yienghneix gangj, lwgda cix mbouj gamsim youq ndaw ding ra bae ra dauq. Mbouj miz gingqda, daxmeh baenzlawz hai ci soengq gou ha!

Sawqmwh, youq caengz laj aen congz iq bakdou, fouq gingqda ndaem ndeu cingq dinghdingh ninz gwnz de, gig angjda. Gou angqvauvau buet gvaqbae, mbat gaem gingqda hwnjdaeuj, sing hung hemq naeuz:“Dauqdaej ra ndaej lo!” Gou najrongh dwk yienh gingqda hawj daxmeh.

“Linzlinz, mwngz goenglauz hung bw!” Daxmeh buet gvaqdaeuj, sim’angq dwk dawz gingqda.

Caet diemj haj cib faen, dou vaiqdangq hwnjloh.

(Cinz Haulinz raiz / Lij Lungzfangh hoiz)