Banringzgvaq ndit ndatgyanggyang, gou caeuq doengzhag caez bae yinzminz giyen. Gwnz loh dou youh gangj youh riu angq raixcaix, dou couh yaek hwnj aen daizheiq Cietheiq“Vamoiz Iq” Gaiq Daih- it yienjheiq lo.

Byaij haeuj yinzminz giyen, dou daengx boux- yienj heiqgobwnj 《Boux Mizyinx Suh Dunghboh》haenx cungj youq baihlaeng daizheiq caj, dou cungj miz di simgaenj caeuq youheiq. Gou daj baihlaeng baengzmuq laeglemx iet gyaeuj yawjyawj laj daizheiq, raen bouxyawj baenz benq ndaemndi- ndi.

“Daihgya hwnj daiz ra ndei aen diegvih cungq- gyang, haeujsim byaujcingz swhgeij!” Ciz lauxsae riu dwk gujli dou. Gou haenqrengz sup gaemz heiq ndeu, sim menhmenh dingh roengzdaeuj.

Yinhyoz baez yiengj, dah doengzhag mbwk Cinz Singhyij yienj aen gieksaek ceiq youqgaenj haenx yaemq din mbaeu sien hwnjdaiz.

“Yijvwnz ha, dwg hongdawz ……” De meizda ndiengq doxhwnj, aenbak baenz diuz sienq van ndeiyawj ndeu.

“Yijvwnz ha, hix dwg aengiuz ……” Gou couh riengz laeng de gangj, aen gingdouz boux sezyingjswh ciuq coh dou, gou hix riu ndaej engq ndeiyawj!

“Danghnaeuz raeuz yaek naeuz boux vunz ndeu gig siengsim, aiq yungh gij swzyij lawz ne?” Bouxgapdoq Sunh Yuihanz nyaeuq bwnda dwk cam.

“Daep saej goenq cieg、daej mbouj ok sing……”Cwnz Singhyij ga dog gvih roengz， goemq aennaj, lumjnaeuz ndaw sim miz haujlai hojnanz.

Gyoengq doengzhag biujyienj doxciep gig ndei, seiz dou caezsing gangj ok “Suh Dunghboh”, aen gieksaek ceiq youqgaenj bouxsai Suh Dunghboh youz Cuh Bozyenj yienj haenx cingsaenz gvaekgvaek hwnjdaiz lo. De ndang daenj buhbauz raez hau, daenj mauh ndaem. “Ai yaya, suenqsuenq ndwen- ngoenz, hix wnggai gwn byahozdunz la.”De vad genbuh, cwxcaih dangqmaz.

Dou baez hob fwngz, coh Dunghboh sienseng gungjhwet baez ndeu:“Baiqraen Dunghboh sien- seng!”

Riengz muq heiq ciengz ceiq doeklaeng yienj sat, laj daizheiq yiengj sing bek fwngz caeuq sing angqhemq lumj byajraez nei. Ciz lauxsae youq henz muq riu mbouj haep bak, yingx lwgfwngzmeh, gwnz naj gyoengq doengzhag engq dwg miz riu youh gagsaenq.

Neix mbouj dan dwg gij angqvau baenzgoeng, engq dwg liglienh majhung, hix dwg gij ndaejgeiq ceiq dijbauj ceiq nanzlumz duhgou.

(Cangh Yajsenh raiz / Lingz Hinghningz hoiz)