Gorangz deng namh homx maenhdwddwd, de mbouj ndaej mbouj dawz ndangdaej suk baenz ndaek ndeu. “Neix caen dwgrengz.” Gorangz naemj, gou itdingh aeu ndwn hwnjdaeuj, hai bak hung diem heiq singjsien, yienghhaenx itdingh gig ndei! Gorangz itmienh naemj, itmienh roengzrengz maj. Gvaq mbouj geij nanz, de maj ok rag raez caeuq song mbaw faex iq, con ok namh daeuj, ndwn youq laj ndit raeujrub.

Haujlai bi gvaqbae lo, gorangz bienqbaenz go faexcuk hung sang ndeu.

De ndaej yawj daengz gij deihfueng gig gyae gig gyae, yawjraen aen huz iq sawndik raen daej haenx, duzbya youq ndaw raemx youz bae youz dauq. Gocuk hozhaenz lai lo, sim siengj: Danghnaeuz guh diuz faexcuk rox youz raemx ndeu, itdingh gig ndei!

Ngoenz ndeu, miz bouxguhnaz ndeu aemq fagfouj daeuj daengz ndaw ndoeng faexcuk, faexcuk angq raixcaix, couh vad fwngz coh bouxguhnaz, de yaek heuh bouxhaenx daiq de bae ra saedceij moq. Bouxguhnaz raemj gocuk roengz, gwed ma ranz, dawz de guhbaenz aen saz ndeu.

Bouxguhnaz cungj dwg ndwn youq gwnz saz, aeu gaiqcauh vaij bae vaij dauq. Mwh de vaij vaiq, aensaz roxnyinh swhgeij couh dwg ndaej youzraemx, caen dwg cwxcaih raixcaix!

Aensaz fugsaeh bouxguhnaz haujlai bi, ciemhciemh bienq geq lo, mwh youzraemx, mizmbangj deihfueng couh haeuj raemx lo. “Danghnaeuz gou ndaej yietnaiq, haenx itdingh gig ndei.” Aensaz itmienh naemj, itmienh haenqrengz youz bae youz dauq.

Gvaq mbouj geij nanz, bouxguhnaz couh cek aensaz lo, dawz de guh baenz aen eijcuk ndeu.

Aen eijcuk baez yungh youh dwg haujlai bi, de yied daeuj yied roxnyinh swhgeij naenghsoh seiz gig dwgrengz, daengx ndang cungj in raixcaix. “Danghnaeuz gou ndaej raeujrub bouxwnq, haenx itdingh gig ndei.” Eijcuk muengh- yawj gwnzmbwn, ngaemgyaeuj ngeix.

Seizdoeng daeuj lo, boux- guhnaz cek aen eijcuk vaih bae lo, dangq fwnz coemh, eijcuk ndaej hawj ranz bouxguhnaz raeuj baenz hwnz.

Ngoenz daihngeih, boux- guhnaz dawz gij daeuh faexcuk dauj haeuj ndaw ndoeng faexcuk bae, gorangz sup aeu gij yingzyangj daeuh faexcuk. Daengzcog mbouj geij nanz, youh miz go faexcuk ndeu lo!

(Vangz Sinyui raiz / Veiz Cwngzgij hoiz)