“Moix caengz 1300 bingzfueng mij, doengh laeuz ndeu couh 41300 bingzfueng mij, doengh cibhaj caeuq doengh cibroek couh miz 83200 bingzfueng mij, bau hoi ndeu baez daih’it gvet ndaej cibhaj bingzfueng, baez daihngeih gvet ndaej ngeihcib bingzfueng, song doengh daihlaeuz daih’iek aeu 8000 bau.”

Lij Danenz naeuz, lumj boih saw nei, Lungzingh simfug raixcaix.

Lungzingh ndawbak lumj gwn dangzrwi diemzswdswd. daengx ndang diemz fiz lo, miz song boux lauxdoengz bang siuhuq, gamjgik mbouj caenh, bineix seng’eiq mbouj ndei, haicei caeuq souhaeuj baenz fanjbeij. Geij bi neix daeuj, cangjnizswjfwnj lumj fwn gvaq rangz noengq hwnj, Lungzingh hix hai aen ndeu, baenzlawz rox, vunzlai cungj cawx gij huq mingzbaiz.

“Bae，raeuz daengz bouqlaeuj gwn donq haeux ndeu.”

Lungzingh vuenheij dwk naeuz, Vangz Gencingh yawj soujgih, naeuz:“Docih sim’eiq lauxdoengz, seizgan dap ci yaek daengz, gou aeu gaenj baema, deq hong guh caez raeuz caengj comz doxcaeuq gwn haeux.”

Song lauxdoengz hwnj ci Lungzingh bae bouqlaeuj, Vangz Gencingh caj ci hai deuz le caengj naengh cigunghgyauh daengz cehcan dap ci ma ranz.

Gouj

Mbanjliz, mbouj dwg singq Liz, cienzgangj sam bak bi gonq miz geij ranz singq Liz youq gvaq, gyoengqde senj deuz le, geij ranz singq Vangz daj doengbaek deuznanh daeuj daengz Mbanjliz youq, seizneix gaenq miz betcib lai hoh cien lai vunz, diegbo, aenci ginggvaq ndaejnyi hauhdoengz yiengj, mbanj caeuq goengloh gek miz song leix roen, Vangz Gencingh byonghroen roengzci byaij ma daengz bakmbanj, vunzmbanj Vangz Genhuj duq vaiz ma riengh, raen Vangz Gencingh daj Namzningz dauqma, couh deq mbouj gib cam naeuz:“Beixcingh, ra ndaej hong hawj dou guh lwi？” Vangz Gencingh han naeuz:“Miz hong guh lo.” Vangz Genhuj angq naeuz:“Miz hong guh couh ndei lo, dou youq ranz deq nanz lai lo.”

Vangz Gensaiz daj ndaw daemz dwkbya ma ranz, raen Vangz Gencingh le, sikhaek soengq song duz byavanx hawj Vangz Gencingh, Vangz Gencingh doeksaet yat, naeuz:“Song duz bya neix miz cibgeij gaen lo, mwngz ngamq ce song duz bya iq……”Vangz Gensaiz daihfueng naeuz:“Gou miz daemz ciengzciengz miz bya gwn, mwngz dwgrengz ra hong hawj dou guh, docih lo.”（12）