It

Mwngz naeuz gou mbouj naek,

Yawj saeknaj cix rox,

Boh cam baenz maz bingh,

Naj nding daengz goek rwz.

Mwngz naeuz gou mbouj naek,

Yawj saeknaj roxndeq,

Meh cam gou aeu vah,

Bak aj mbouj miz coenz.

Ngeih

Mwngz naeuz gou mbouj naek,

Laep da ciz baenz fangz,

Naemj daengz mwngz le gvang,

Ndang fouz lumj yiuhsa.

Mwngz naeuz gou mbouj naek,

Laep da cix raen ngaeuz,

Vunz guh angq bae youz,

Sim gou fouzfangfang.

Sam

Naek mwngz lumj naek va,

Youq caznya hau maeq,

Fwngz yiu yiu mbouj ndaej,

Faex fad fad mbouj daengz.

Naek mwngz lumj naek va,

Gak gyang Dahbulin,

Aj fwed mbouj ndaej mbin,

Yaek daiminj biendah.

Seiq

Naek mwngz lumj naek gim,

Da cim mbouj ndaej aeu,

Naek mwngz lumj naek haeux,

Caeuz ngaiz mbouj ndaej noix.

Naek mwngz lumj naek gim,

Da raen sim ciz maij,

Naek mwngz lumj naek ngaiz,

Yaek dai lij gwn amq.

Haj

Gou naek mwngz lailai,

Dai sam ngoenz ndaw mbonq,

Boh fonj gyaeuj dauq din,

Sim diuq ndang mbouj doengh.

Gou naek mwngz lailai,

Dai sam ngoenz gwnz congz,

Meh heuh bae guhhong,

Gou gongz lumj bouxbingh.

Roek

Gou naek mwngz lailai,

Ngaiz mbouj gwn hix imq,

Ngeix daengz mwngz le gim,

Sim cieg lumj feiz coemh.

Gou naek mwngz lailai,

Cai haeux donq mbouj gwn,

Naemj daengz mwngz le lwnz,

Fangzhwnz riux doxcoh.

（注：gvang、gim、lwnz意为：“阿哥”或“阿妹”）