Gou ceiq maij gij go makginzsaeh ranzcoj，ndaw mbanj ndaem go makginzsaeh，bakmbanj、laeng mbanj、gwnzbo seiqlengq cungj ndaem. Seiz mak baenz，dauqcawq henjriri、hoengzfwgfwg，gig gyaeundei.

Daengx bi seiqgeiq，go makginzsaeh bienqvaq gig hung.

Seizcin，dwg geiqciet cin raeuj va hai，miz fwncin nyinh，go makginzsaeh hix dok okdaeuj，gvaq song sam ngoenz，go makginzsaeh haidaeuz ciemhciemh dok mbaw oiqupup.

Ngux nyied co’ngux bae ranz，gou youh bae yawj go makginzsaeh，gij mbaw gig mwnnoengq，doengzseiz hix giet haujlai mak iq，gij mak iq caegcaeg ndoj youh laj mbaw，lumj caeuq raeuz guh gaemhndoj nei. Youq gyae yawj bae，cungj mbouj rox gizlawz dwg mak，gizlawz dwg mbaw.

Seicou daeuj daengz，mak ciemhciemh baenz，haidaeuz lij dwg aen iqiq youh heuheu，gvaqlaeng bienq lumj aen daizgiuz hung. Gvaq ndwencaet，makginzsaeh couh ciemhciemh bienq henj，gij mak henj youq ndaw mbaw，yienh ndaej gig lwenqda. Gou ndwn youq laj go mak, ngiengxgyaeuj yawj go makginzsaeh haenx，raq rumz ndeu ci daeuj，mbawfaex caeuq mak bibi buengqbuengq，gyoengqde lumj coh gou riunyumnyum.

Cib nyied，dwg aen geiqciet fungsou ndeu，hix dwg makginzsaeh fungsou seiz，gwnz gomak venj rim makginzsaeh. Vunzmbanj bouxboux nyaengq mbaet mak，makginzsaeh sou daengz ranz，miz vunz aeu cimq guh makginzsaeh byot，miz vunz aeu daeuj dak guh bingj makginzsaeh. Daihgya youq ndaw reih itmienh gangjriu，itmienh mbaet mak，nyaengq mbouj dingz. Gyoengqde baenz loz baenz loz mbaet roengzdaeuj，baenz ci baenz ci rag bae ranz，ndangdaenj yienznaeuz naek，hoeng gyoengqde bouxboux najriu najhai.

Mbanjranz gou dwg aen dieg guh bingj makginzsaeh ndeu. Gyoengq vunzmbanj sou makginzsaeh dauq，yungh gihgi baenz aen baenz aen bok naeng ndei，caezcupcup baiz youq ndaw lamz，lamz rim couh dawz hwnj gwnz gaq bae dak. Dak seiz, baez aen baez aen fan，yienghneix bingj makginzsaeh sauj vaiq，gij makginzsaeh bok naeng ndei haenx ngoenz gvaq ngoenz bienq hoengz. Daih’iek dak aen singhgiz ndeu，couh ndaej gai aeu ngaenz. Gij bingj dak ndaej haenx aen’aen benj, aen’aen unqnemnem，gwn haeuj bak youh rangdiemz youh niunini，gig ndeigwn, bouxgeq lwgnyez bouxboux maij gwn.

Bineix gou bae ranz，ngamqhab bungz daengz ciet makginzsaeh. Ngamq byaij daengz bakmbanj，fanh moux makginzsaeh yienh youq baihnaj，makginzsaeh henjriri，gig ndeiyawj. Yinx daeuj gak dieg bouxhek. Song henz loh，vunzmbanj gag dawz makginzsaeh、bingj makginzsaeh okdaeuj gai. Gyoengq bouxhek baebae dauqdauq，miz vunz cawx makginzsaeh，miz vunz cawx bingjlwgsaeh, miz vunz youq laj go makginzsaeh ingjsiengq、cimz mak, miz gangj miz riu，gig nauhyied.

Seizneix，vunzmbanj bouxboux baengh song fwngz gaenxguh，ndaem hwnj daihbaj makginzsaeh, gyalai souhaeuj，ranzranz hwnj ranzlaeuz，gwndaenj ngoenz beij ngoenz ndei.

Seizdoeng，mbaw go makginzsaeh cungj loenq liux，gij mak mbouj sou daengz lij venj youq gwnz go，engqgya hoengz，youq gyae yawj bae，lumj aen dem aen daengloengz.

Daengx bi cin、hah、cou、doeng seiqgeiq，gou ceiq maij seizcou.