Rumzcou ci daeuj fifi, mbwn mbouj rox mbouj nyinh ciemhciemh bienq liengz lo.

Sing duzbid gwnz faexyangz henz roen lij haeuj rwz caca, hoeng gaenq mbouj lumj seizhah nei goksasa lo. Gou iuj din dwk, ngiengxgyaeuj bae ra, mbawfaex maedywdywd dangj da gou, hix cw ndang duzbid bae.

Rumz seiz mbouj seiz gienj daeuj geij mbawfaex henjroz, lumj duzmbaj saekgim youq gyang mbwn mbinfoux. Mbaw- faex mbinyebyeb, doeklaeng doek youq laj goek faex, gou ndawsim nyaenx mbouj ndaej mizdi doeknaiq.

Go haeuxdaeq, mbouj rox seizlawz maj sang gvaq gou lo, gyoengqde dingj diuzhwet saeq- sed, yaengx mbawraez heuswd, lumj aen bingdoih ndeu nei, vifung gvaekgvaek. Riengzva haeuxdaeq deng ndit ciuq ndaej ronghyabyab, lumj gyaeuj byoemhenj gyaeundei ndeu, ndeiyawj raixcaix.

Ndaw cazrum rwenz ok sing daekgaeuj ndeidingq, seizcou mbouj caiq caemcingx, demlai le faenh yinhfeih ndeu.

(Gyangh Mungdiz raiz / Nungz Cinfung hoiz)