“Daxbuz, gou gaemh ndaej lo! Gou gaemh ndaej lo! Youq neix ne!” Ngoenzhaenx, gou song fwngz riuj song duz gaeq, byaij baihnaj gyanghongh bae, roxnyinh geijlai miznaj ha! Seizneix, gou naengh youq baihnaj congh cueng, dauqngeix gienh saeh mizyinx haemhhaenx hwnjdaeuj.

Haenx dwg byai singhgiz banhaemh ndeu, daxbuz heuh gou bae gaeb song duz gaeq ma aeuq dang, gou sikhaek buet bae baihlaeng gyanghongh gaeb gaeq. Aenvih yaek gaeb gaeq, gou couh haeujsim yenzgiu baenzlawz gaeb gaeq gonq, gaenq hag rox aen bonjsaeh ak gaeb gaeq lo.

Aeu Gij Ndeigwn Yaeuhlox

Raeuz cungj rox, duzgaeq haengj gwn haeux. Aeu haeux daeuj yaeuh duzgaeq ceiq yungzheih yaeuh ndaej duzde. Gou dawz aen vanj hung cang haeux rim ndeu, vanq haeux youq ndaw cauzrin, bang gaeq yawjraen le cungj humx cauzrin, doxcanj doxciengj dot haeux. Hainduj gaeb gaeq lo! Gou yaemj din yaemj fwngz heux hop hung ndeu, heux daengz henzndang gyoengq gaeq, gyoengq duzde cungj mbouj rox saek di. Gou menhmenh nod din, mbouj gamj guh ok saekdi sing, yawjraen duzgaeq lij dot haeux ngaekngaek, gou rox seizgei daengz lo, gou gig vaiq iet fwngzswix gaemdawz aen gyaeuj duz gaeq ndeu, mwhneix duzde cak dwk buekmingh siengj deuz ok fwngz rengzrwd gou, hoeng baenzlawz baenzneix yungzheih ndaej deuz! Gou aeu aendungx yungh rengz dingj baihndang duzgaeq, aeu fwngzgvaz gaemdawz gij fwed de. Duzgaeq lij youq ndaw fwngz gou cukcak, siengj daj ndaw fwngzgvaz gou cak okbae, yawj duzgaeq couh yaek biq lo, gou sikhaek soeng aen gyaeuj de, song fwngz gaem fwed de, duzgaeq cungjsuenq deuz mbouj ndaej lo, lumj aen giuz loh heiq nei, gou daekeiq raixcaix: “Haha, mwngz lij dwg ngaiz gou gaemh aeu lo!”

Heuhdoeng Hoenxsae

Cungj geiqmaeuz neix ceiq genjdanh, hoeng guh hwnjdaeuj cix mbouj yungzheih. Ndaw riengh gaeq miz diuz loh ndeu, gyaeuj loh dwg mienhciengz, doeng mbouj okbae. Hoeng cingqngamj miz duzgaeq ndeu youq gyang loh, gou siujsim riri byaij daengz henz de, siengj gaeb de, hoeng de sawqmwh mbouj doengh, lumj yawj rox gijmaz nei, gipmuengz bek fwed siengj buetdeuz, gou gipmuengz gyaep hwnjbae, mbouj ndaej hawj “gaiq noh henz bak youh mbin deuz” lo. Gou caeuq duzgaeq da cim da yawj dwk, gou guj duzde mbouj miz giz buet deuz, itdingh daj dingjgyaeuj gou mbin gvaq. Yienghneix, gou canggyaj daj baihlaj bae gaeb duzde, caen dwg dahraix, de yunghrengz bek fwed, siengj daj gwnz gyaeuj gou mbin gvaqbae, gou baez yat, de couh gag diuq haeuj ndaw “hongx”gou bae. Gou angq raixcaix, mwh gou riuj song duz gaeq neix hawj daxbuz yawj, daxbuz haenh gou naeuz: “Va! Mwngz caen dwg bouxnyez gaeb gaeq ak ndeu!” Gou dingq le ndaw sim diemzsubsub.

Samcib roek geiq, song geiq gaeb gaeq. Neix couh dwg gij bonjsaeh caixhangz gou.

(Ciz Swjgyauz raiz / Veiz Yennaz hoiz)