Gou miz diuz heuj ndeu honz lo.

Gaxgonq, cijaeu gou gwn makbingzgoj roxnaeuz henx haeuxyangz, diuz heuj honz couh ndaej doek. Baezneix, song aen singhgiz gvaqbae lo, mak- bingzgoj gou hix gwn lo, haeuxyangz gou hix henx lo, lij haeb oij dem, diuz heuj neix vanzlij mbouj doek, maenh lumj diuz ding ding gwnz faex nei, mbouj raen lai honz saek di.

Daxmeh yawj le, yaengyaeng naeuz gou nyi:“Caiq mbouj ciemz diuz heuj neix bae， diuz heuj moq couh deng caenx ngeng lo, aeu ganjvaiq bae yihyen ciemz bw!” Dingqnaeuz yaek bae yihyen ciemz heuj, gou sikhaek siengj daengz gij faggimq fagnip ciemz heuj caepcat youh haeu lwed haenx. Gou fwt couh naemj daengz gvaq geij ngoenz yaek geizgyang gaujsi, couh han daxmeh naeuz:“Gvaq geij ngoenz couh yaek gaujsi lo, mboujcix caj gaujsi sat cij bae ciemz heuj ba!”Daxmeh ngaekngaek gyaeuj, han lo.

Hoeng, gij wnggai ngaiz cungj ngaiz. Gaujsi ngamq sat, daxmeh couh naeuz:“Baezneix wnggai bae ciemz heuj luba!”Baezneix, gou hix ra mbouj ndaej gijmaz leixyouz wnq lo, cij ndaej riengz daxmeh bae yihyen.

Bae daengz yihyen, gou raen gij vunz daeuj yawj bingh neix lailai daihdaih. Gou maqmuengh ngoenzneix baizdoih baiz mbouj daengz gou, hawj gou ndaej ndoj gvaq baez in neix, gou doiq daxmeh naeuz:“Ngoenzneix vunz baizdoih lai lai, gou yawj lij caengz lwnz daengz gou canghyw couh roengzban lo. Raeuz gvaq geij ngoenz dem menh daeuj ba!”“Daeuj cungj daeuj lo, raeuz caj yaep dem baenzlawz mbouj ndaej.”Daxmeh rox gou siengj gijmaz, riuriu le, daiq gou bae baizdoih gvaqhauh.

Gou naengh youq gwnz eij, da cim aencung gwnz ciengz, ndawsim gouz seizgan gvaqbae vaiq di. Hoeng, mbouj gvaq geijlai nanz, canghyw couh hemq naeuz:“Gyoengq lwgnyez yaek ciemz heuj gvaq gizneix daeuj caj gonq!”Daxmeh baez dingq, riuj gou lumj riuj gaeqlwg nei, riuj daengz dangqnaj canghyw bae. Aensim gou diuq daengz conghhoz lo. Gou lienzlienz mbaet caw, roengzrengz diemheiq. Hoeng mwh canghyw dawz faggimz byaij gvaqdaeuj, gou lij nyaenx mbouj ndaej “a” hemq sing ndeu. Gou yaepcan baenz bouxbingh ndaw yihyen deng vunz comz yawj ndeu, lumj yawj bajheiq nei. Gou caemh cuengqsing daej naeuz:“Gouqmingh ha, gou mbouj ciemz heuj!”Goq mbouj daengz najmong lo.

Mwh neix, daxmeh dep henz rwz gou naeuz vubveb:“Ciemz heuj le mwngz couh gwn ndaej dangznae lo.” Canghyw riuhehe, ngaek gyaeuj naeuz:“Gwn dangznae ndaej naeg lwed、 siu foeg, ndaej gwn!” Naeg lwed? Siu foeg? Meh ha, ciemz heuj caen dwglau ha! Hoeng baez siengj daengz ndaej gwn dangznae habbak, gou couh mbouj lau lo, gaem damj ninz youq gwnz eijguhyw, laep da youq. Gou roxnyinh canghyw youq gwnz nohheuj gou cat di yw, riengz daeuj couh yungh rengz ciemz heuj okdaeuj lo……

“Daengz giz canghyw yawj ciemz heuj, dwg mbouj dwg caen baenzneix dwglau ne?”Youq gwnz loh ma ranz, daxmeh raen gou gwn dangznae miz feihdauh dangqmaz cix cam gou. Gou lumh mbiengj gemj loq foeg haenx, siengj daengz haxbaenh daej heuh gouqmingh, han naeuz：“Mbouj dwglau, haxbaenh caen miz di saetnaj!”

“Ha ha……” Youq gwnz loh miz sing riu sing hemq, angqangq yangzyangz.

(Ciz Cenzyoz raiz / Veiz Caijcinh hoiz)