Vangz Gencingh daj hwnjci daeuj mbouj gangj saek coenz vah, Cinz lauxbanj dwg boux vunz mingzbeg ndeu, de ceiq mbouj muenx gij vunz yaem, dangqnaj mbouj gangj baihlaeng luenh damz, aeu cungj vunz yaem neix daeuj guhhong haethaemh cungj oksaeh, suenq lo, bimoq caiq gangj, saeh youqgaenj dangqnaj dwg guh ndei song doengh laeuz neix.

Byaij daengz baihnaj song doengh laeuz sang, Cinz lauxbanj vix song doengh laeuz sang naeuz:“Couh dwg song doengh laeuz neix, doengh cibhaj caeuq cibroek, raeuz hwnjbae yawj.”

Hwnj doengh cibhaj, song aen dendih hwnjroengz mbouj daengx, geij aen cidienh seiqloek iq cang rim ciendeih deq hwnj dendih, youh miz geij boux canghfaex gwed benj hung riengz daeuj.

Gyoengqvunz raen Cinz lauxbanj, bouxboux cungj dongx de, de riunyumnyum, yawj raen dendih nyaengq lai, couh doiq Lij Danenz naeuz:“Raeuz byaij mbaeklae hwnj sam laeuz bae.”

Caengz daihsam, caengz yamq haeuj lajroq bakdou, ndaejnyi sing“ci......”cienzdaeuj, cauj rwz yaek nuk, lajroq songgyaeuj seiq aen ranz, hoenznamh lumj fwjhau gingjok bakdou daeuj, canghsuijden youq gak aen rug gvej ciengz hai cauz cuengq guenj densen, miz boux hauxseng daenj goujcau ndeu raen Cinz lauxbanj daeuj, doq haeuj ranz bae heuh gyoengq vunz daengx roengzdaeuj, Cinz lauxbanj haeuj- bae, Lij Danenz Vangz Gencingh riengzhangx, Cinz lauxbanj doiq gyoengq vunz naeuz:“Gou daiq song boux saefouh gvethoi daeuj yawj.”

Vangz Gencingh doiq gyoengq vunz canghdienh ngaekngaek gyaeuj, Lij Danenz yawj hix mbouj yawj gyoengqde da ndeu, Cinz lauxbanj myaegraen, sawqmwh doiq Vangz Gencingh miz di ngeiz, de cam Vangz Gencingh：“Vangz saefouh, mwngz guh doengh lawz?”Vangz Gencingh naeuz:“Couh guh doengh neix.”

Bet

Lij Danenz miz boux lauxdoengz ndeu, heuh Lungzingh, daxboh Lij Danenz caeuq daxboh Lungzingh gapbang guh seng’eiq, baedauq sug le, gag miz boux lwgdog ndeu, song lwgnyez cingqdwg doengzbi doengzndwen seng, seiz haj bi, couh hawj song lwgnyez gap doengz, song ranz lumj caen beixnuengx nei gvanhaeh gig ndei, daegbied dwg fueng lawz yungh cienz miz gannanz seiz, doiqfueng mbouj miz gijmaz leixyouz nonxek, bonjfaenh cienz noix, couhcinj ciq hix aeu bangcoh.（10）