Ruzhoengz hai diuz loh,

Vih guekcoj lwgminz,

Coh baihnaj yamqdin,

Vih lwgminz cauhfuk.

Cungqbauq ok cwnggenz,

Yinzminz cenz guh cawj,

Ndeicawq dangjcwng hawj,

Lwgminz lawj haenqguh.

It gouj seiq gouj nienz,

Lwgminz cienz guh cawj,

Digoz hoenx guek gawj,

Siengjfap sawq daeuj hangz.

Guek raeuz buekmingh hen,

Gensez doengzseiz guh,

Yienghyiengh cungj mbouj nguh,

Buqsoiq fangzhwnz hangz.

Gaijgwz youh hailangh,

Lwgminz angq simhai,

Gamjguh cauhmoq lai,

Hawciengz cawxgai vuengh.

Bangfuz gyoengq ranzgungz,

Mbeihung bae cauhmoq,

Cwngcwz senhconz doh,

Monzloh hwngvuengh lai.

Dangjcwng dawz mbei cin,

Cenzminz haeuj siujgangh,

Bouxboux cungj simsangj,

Caez angq danq dangjcwng.

Mbanjmbanj lengj youh gyaeu,

Cungj naeuz roen ndeibyaij,

Daengloh vunzlai maij,

Banhaemh byaij ancienz.

Guekcoj raeuz fouqmiz,

Lwgminz miz maqmuengh,

Ngoenz beij ngoenz vuenyungz,

Angqhoh bungq cenjlaeuj.

Diuz it rangh it loh,

Guekcoj guh ndaej ndei,

Doxgap bei(bi) dem bei,

Cungj ndaej caez fazcanj.

Mbouj lumz bak bi cienz(gonq),

Ginghci lienz doicaenh,

Gwnz gozci ndwn maenh,

Guek rog haenh ndaej lai.

Binghraq gyuek gwnzbiengz,

Guek raeuz giengz dahraix,

Binghraq deng raeuz caij,

Guek rog maij raeuz bang.

Vunz guek raeuz simsienh,

Cienzmienh bae hozcoz,

Son vunz guekgungz doz,

Vunz boz raeuz simsoh.

Haij lu gungh gyauhdungh,

Cungj dwg doengratrat,

Guekcoj ndaej hwngfat,

Byawz hix at mbouj roengz.

Mbouj dwg loq fangzhwnz,

Hwnj mbwn cauh “Denhgungh”,

Guh “Bwzdouj Hidungj”,

Seiqgyaiq cungj hoenghdungq.

Gozfangz gohgi ak,

Mbouj dwg bak luenhnaeuz,

Cungj dwg miz laizyouz,

Dinvunq louz haenzcik.

Guekcoj daxmeh raeuz，

Caenh daiqdaeuz baenaj,

Hawj lwglan vaiq maj,

Hawj raeuz gvaq ndaej ndei.

Guekcoj daxmeh raeuz,

Binaengz you mbouj noix,

Cungj mbouj miz fanjhoij,

Riunyumj doiq hojnanz.

Aen meh naek gvaq ndoi,

Raeuz lawz boiz mbouj liux,

Ndawsim raeuz gag iuj(rox),

Ca faenmiux bauqdap.