Gou, dwg boux canghsei mbouj okmingz ndeu

Dangjrumz raiz roengz hot sei neix

Hawj gou aeu hot sei naekcingz neix dak hawj rumzcou

Muengh de youq doek fwn gvaqlaeng bungz raen saidoengz

Gou lij naemj aeu cungj sing ceiq seuqcengh ndeu

Caeuq mwngz naeuz

Gou couh dwg go nywj iqet ndeu, roxnaeuz

Godaengngoenz seizcou gaenq baenzsug ndeu

Ndwn youq henz Dahvangzhoz, muengh raemxlangh laehuhu

Ndwn youq gwnz Cangzcwngz, gij lwed ndatfwd geujfoedfoed

Moix boux vunz doxbungz

Cungj riunyumnyum

Gou yaek coh mehmbwn gvangqlangh naeuz

Gou hainduj aeu bonjfaenh dangguh naed ceh ndeu

Aeu sei caeuq sengmingh

Ndaem youq gwnz diegnamh baihnamz guekcoj

Moix majhung hauzmij cungj miz gij mbei guh sei

Baenzneix, youq baih haijyaz neix muengh coh doiqhamq

Roxnaeuz, soemh fwn doek roengzdaeuj ngonciengq hot sei Cinghcang

Moix lwnz seizgan bienqvaq

Comz baenz diuz dah doxgyaez fanh gingj

Nyigrumz mbinngeg, gou naemj caeuq mwngz naeuz

Gou hawj naed ceh baihnamz guekcoj neix

Haiva、dawzmak

Sou ndaej moix ciengz ndaejhingz、ciepcoux fad max dauqma

Nanzhaij heunaunau doiqwngq Denhsanh nae mbinfefe

Vujyoz(haj goengq bya okmingz) sangngaungau nyoengx hwnj

raemxlangh heusau seiqhaij

Gwnz gemj miz aen cenjlaeuj feuzfwdfwd

Ndaw ceujlaeuj neix miz haujlai vuenyungz ngoenzcog

Gou naemj sing hung caeuq mwngz naeuz

Godaengngoenz hai ok va henj lumj gim nei

Naed ceh doek youq baihnamz guekcoj

Gaenq deng gadog saenqdaenh

Hawj indot dinghmaenh

Dan naemj caeuq mwngz naeuz

Gou, boux canghsei mbouj okmingz neix

Ciengxlwenx ciengq hot sei danqhaenh sengmingh

De dwg vunz Cungguek