Daxmeh maij ciuqsiengq dangqmaz, daegbied dwg bang gou ciuq. Ndaw bouhsiengq soujgih de cungj dwg gij siengq gou. Yawj, neix dwg gij siengq gou ndaej cib bi ngoenzseng le daxmeh bang ciuq. Ngoenzhaenx, daxgoeng daxbuz hawj gou aen hoengzbau hung ndeu. Banhaemh, gou naengh youq gwnz mbonq naemj: Baez fwndoek, hwet daxgoeng couh lumj deng rumznit con haeujbae nei, in dangqmaz; geij ngoenz gonq, daxbuz mbouj siujsim aen gingqlauxva de doek vaih lo, mboujmiz gingqlauxva, de cungj dwg nyaeuqda dwk yawj densi. Mboujcix, gou couh aeu aen hoengzbau hung neix cawx huqlaex hawj gyoengqde ba! Gou gaem gij cienz, baez mbaw baez mbaw geq dwk. Daxmeh yawjraen le, gaem soujgih ciuq roengzdaeuj lo.

Gaxgonq, gou mbouj rox daxmeh vihmaz cungj dwg bang gou ciuqsiengq. Cig daengz miz mbat ndeu, gou fanyawj soujgih de, yawjraen mbaw siengq gou daegdaengq goemq naj haenx, couh cam daxmeh: “Seizde gou vih gijmaz goemq naj ne?” Daxmeh riuriu, gangj:“Seizde mwngz ngamq vuenh heujdou, haeujeiq yienghsiengq lai, mbouj hawj gou ciuq ho!” Caen ienqhoij ha, gou caen siengj yawjyawj gij yiengh swhgeij ngamq vuenh heujdou haenx, hojsik yawj mbouj raen lo. Yaephaenx, gou dauqdaej rox lo, daxmeh ciuqsiengq hawj gou, dwg siengj geiq gij rizroen gou majhung.

Seizneix, daxmeh baez gaem soujgih hwnjdaeuj, dawz gingdouz doiqcinj gou, gou cungj mbouj ged saekdi naj riu ronghsag coh de. Aenvih gou rox, gij gyaez ndaw soujgih daxmeh, moix mbaw cungj gig dijbauj.

(Vangz Sijyez raiz / Nungz Cinfung hoiz)