Gyanghaemh, gou lumj bingzciengz nei naengh youq henz daiz sij cozyez, sawqmwh, duz mbaj ndeu mbin gvaq naj da daeuj, dajduenh gou guh cozyez lo. Cijraen duzmbaj youq gwnz daizdaeng mbinfoux, doiq fwed de wenjyebyeb miz di rongh. Gou deng duzmbaj iqetet neix supyinx, sikhaek cuengq bit roengzdaeuj, siengj bae gaeb duz mbaj “mbouj cingj cix gag daeuj” neix.

Gou mbaetheiq mbaetcaw, menhmenh ndwn hwnjdaeuj, yup hwet dwk, siujsim sisi iet fwngz okbae, siengj nebdawz duz mbaj haenx. Hoeng, de lumjnaeuz senq couh rox nei, riengjvaiq dwk ndoj gvaq song faj fwngz gou. Ai, duz mbaj ganvad neix! Gou mbouj cuengq gvaq de, youh caiq ietfwngz okbae, hoeng moix baez gou depgaenh de, de cungj ndaej riengjret mbin bae gizwnq. Gou gyaep bae gyaep dauq, daengx gyaeuj hanh dumz caez, hoeng baenzlawz cungj gaeb mbouj dawz. Yawj, de vadvad doiq fwed, ngauznged aenndang baenq gvaengx youh mbin dauqma lo, lumjnaeuz daegdaengq nyex gou nei, gou gikheiq yaek dai bae!

De yied mbin ndaej daekeiq, gou yied ndwnj mbouj roengz gaemz heiq neix, cungj banhfap neix guh mbouj doeng caiq vuenh lingh cungj. Baezneix gou gietdingh yungh honggaiq daeuj gaeb, gou ra aen batdiet daxmeh swiqbyaek daeuj, maqmuengh ndaej vaiqdi gaebdawz de. Caepcawq ndei le, gou naihsim caj duzmbaj caiq mbin daeuj. De daeuj lo, de daeuj lo, gou fwt vax aen batdiet doq goeb gvaqbae. “Gvang!” Sing hung ndeu saenq haeuj rwz gou. Haha, lwg mbaj neix, baezneix mwngz miz fwed hix mbin mbouj okbae, mwngz laihnaeuz gou ceih mbouj ndaej mwngz! Gvaq yaep ndeu, gou siujsim gwenj batdiet hai geh iq he, siengj yawjyawj duzmbaj youq ndawde baenzlawz yiengh, hoeng gou lwgda gvaengx yawj baenz hop, baenzlawz cungj ra mbouj raen duz de. Cingqngamj youq seizneix, duz ngaeuz ndeu daj baihnaj gou mbin gvaqbae, a, lij dwg duz mbaj haenx, de vanzlij cwxcaih dwk mbin ha, ndaw sim gou cix roxnyinh doeknaiq liux: Dauqdaej dwg gou guh mbouj deng, roxnaeuz dwg duz mbaj neix coengmingz lai?

Youq mwh gou mbouj siengj caiq leixlangh duzmbaj, daxbuz byaij haeujdaeuj lo. De raen gou najsaep doeknaiq, couh cam cingcuj dwg gijmaz laizyouz. Daxbuz riunyumnyum yawj gou, riengz- laeng bae aeu aen daengciuq iq, yaeng’yaeng cuengq youq mbiengj baihgwnz duzmbaj, duzmbaj raen miz ronghdaeng, menhmenh mbin haeuj ndaw daengciuq bae. Seizneix, daxbuz fwngzmbaeu gaem aen daengciuq hwnjdaeuj, duzmbaj couh deng de gaebdawz lo.

Gou cimyawj daxbuz, ndaw sim boiqfug dangqmaz. De yungh banhfap genjdanh, gig yungz- heih couh gaijgez le gij saeh gou buenqngoenz cungj gaijgez mbouj ndaej haenx. Daxbuz riu naeuz: “Gingniemh caeuq dungxcaiz, mizseiz beij dandan roengzrengz guh engq mizyungh.” Ciuq neix ma yawj, mwh youqgaenj lij yaek aeu lauxsouj okfwngz!

(Dangz Yimingz raiz / Lij Siulingz hoiz)