“Gwgw……” Geizheih, ndaw ranz- saeuq baenzlawz miz oenq? Itdingh dwg daxgoeng youh gwn ien lo! Deq de dauqma, cam de gonq.

“Ngadnged”, daxgoeng dauqma lo, gou doq diuq hwnjdaeuj, buet gvaqbae cam naeuz:“Daxgoeng, mwngz dwg mbouj dwg youh gwn ien la?” “Baenzlawz ndaej? Gou mbouj gwn!” Gou fan da hwnj mbwn mbat he, naeuz:“Mwngz yaeuh gou, gou cungj supsuq daengz lo.” Daxgoeng riuhehe:“Ndei ba, gou nyinh, baezlaeng mbouj gwn lo.” Gou simsiengj: Hw, daxgoeng youh lox gou! Ngoenzneix couh cuengqgvaq de ba.

Daxgoeng cungj gwn ien mbouj baenz hw, gwn ien doiq bwt mbouj ndei, caiqlij gij heuj daxgoeng cungj bienq saek lo! Mbouj ndaej, aeu hawj de gaiq ien.

Raiz cozyez liux le, gou guh mbaw biuj giva gaiq ien ndeu hawj daxgoeng: Gyanghaet mbouj gwn, lajbyonghngoenz gwn ciuq ndeu, gyanghaemh gwn ciuq ndeu. Daxgoeng banhaet boenq, mboujmiz seizgan gwn ien; lajbyonghngoenz caeuq banhaemh miz hoengq, gak hawj de ciuq ndeu gaij ngah ba.

Mwh gou dawz mbaw biuj gaiq ien neix cuengq youq dangqnaj daxgoeng, de nyengh mbat he, dawz hwnjdaeuj yawj le geij cih saw, couh ienq naeuz:“Aiyo, neix mbouj dwg aeu mingh gou ha? Mbouj gaiq ndaej law?” Gou gangjndongj naeuz:“Mbouj ndaej! Biet- dingh aeu gaiq! Ngoenz- cog hainduj gaiq.” Gou mboujguenj saeknaj daxgoeng baenzlawz, saetdiuq bae ninz lo.

Ngoenz daihngeih, gou doq hwnq doq muedsou gij ien dax- goeng. Va! Caen dwg mbouj noix, hab iq hab laux、ciuq ndeu song ciuq、baizswj mbouj doengz, guenj de ne, cijaeu dwg ien, haemzbaengzlaengz muedsou liux! Baez “daih baetcawz” neix, gij ien daxgoeng lai dwk gou ca di dawz mbouj roengz lo. Mboujgvaq gou sim’angq raixcaix, ceiqsiuj, gou goenq gij “haeux” daxgoeng lo.

Baez daengz banringzgvaq, daxgoeng sikhaek daeuj aeu ciuq ien de, gou gig sangj couh hawj de lo. Hoeng, gou roengzdangz dauqma, cix raen noix hab ien ndeu! Gou ra bae ra dauq, caen youq ndaw doengjgvih daxgoeng ra ndaej dahraix. Gou najhaen cam daxgoeng:“Gij ien vihmaz youq gizneix?” Daxgoeng hemqgouz:“Lan gou ha, ngoenz ndeu gwn song ciuq ien, noix lai lo…… Couh ce hab ndeu hawj gou ba……” Gou han naeuz:“Mbouj ndaej, vihliux mwngz ndangcangq, hix vihliux dou ndangcangq, mwngz gaiq hix aeu gaiq, mbouj gaiq hix aeu gaiq!” Song dou buek bae buek dauq, daxgoeng doeklaeng dapwngq lo. Mbouj- gvaq, de miz aen iugouz iq ndeu-Aeu baez yamq menhmenh guh roengzbae. Ndaej ha, yawj de bingzseiz baenzneix gyaez gou, gou couh dapwngq de ba!

Ai, gou yawj daxgoeng gaiq ien rap naek roen gyae ha!

(Lij Swjgyah raiz / Lij Lungzfangh hoiz)