Ndit cik youq gwnz namh manhsaengsaeng, gou youq ndaw ranz hanh rihnangnang, caiq diuz aen gunghdiuz daemq song doh le, gou ing youq henz cueng yawj baihrog. Gwnz daihloh hoengq- hanghang, gwnz namh gij fwi hwngq de gung hwnjdaeuj, hwngq daengz gyoengq lwgnyez bakgvij bakdou aen bouq gai huq haenx cungj deuz lo, duzroeg caemh ndoj youq ndaw raemhfaex langxliengz. Gij mbaw go’myokgveiq ndaem youq ndaw hongh haenx miz di reuq, duiq doxroengz, lumjnaeuz yaek bang doengh dujva caengz hai haenx dangj ndit. “Haujlai nanz mbouj doek fwn lo, go’myokgveiq neix lix mbouj lix ndaej dem?” Gou lauheiq de dai bae.

Mbwn lumj rox ndaw sim gou ngvanh gijmaz nei, fwjndaem youq gwnzmbwn baenz benq baenz benq comz daeuj, aen daehsuliu gwnz namh deng rumz hung gienj hwnj mbwn bae, gvaq yaep ndeu caiq “ciu” dwk doek roengz laj ma. “Raq fwn neix onj hung lo!” Daiq gou yawj ok rog cueng bae da ndeu le cix yienghneix nam naeuz. “Hung- lung!”Dahraix! Rog cueng hainduj deng fwn fat dwk “bibi baba”, baez yaep da ndeu, fwn couh lienz baenz benq, “coco caca” boeg roengzdaeuj.

“Go’myokgveiq mbouj ngaiz gijmaz ba?” Gou hainduj heiq go- myokgveiq ngamq did va’ndok haenx, gaenlaeng gou doq bae yawj go faex de, gou siujsim riri roengz laeuz bae. Mbwn lij laepsaengsaeng, lumj gij maegndaem ndaw bingz mbouj siujsim daemj laemx nyumx hwnjbae nei, raemxfwn youq gwnz namh conx bae fofo. Gou fwngz ndeu riuj gavaq, fwngz ndeu dawz liengj, byaij yamq dingz mbat menhmenh bae daengz henz go’myokgveiq. “Didi dada”, gou depgyawj bae dingq gij sing raemxfwn doek youq gwnz mbaw de, gij sing de lumj diuz go iq nei. Gou ndwn youq haenx haujlai nanz, doeklaeng deng vunz- ranz hemq baema lo.

Fwn dingz lo, doenghgo youq ndaw hongh haenx caiq lix gvaq daeuj lo. Mbwn bienq ronghsagsag, hoengheiq moq dangqmaz, mbwn hix bienq liengz haujlai, gou buet bae ndaw hongh haenx, ndaw sim roxnyinh geizheih, byaij daengz laj go’myokgveiq. “Rang hiha!” Gij va’ndok go’myokgveiq mboujdanh mbouj deng fwn rumz dwk loenq, yawj hwnjdaeuj dauqfanj engq lai ndei. Bande, gij hom go’nywj caeuq gij heiqva diemzrang go’myokgveiq doxgyaux, gij rang neix rox ndonj haeuj ndaw sim bae, ndei raixcaix.

Ndwenngoenz raeuz gizgiz cungj yo miz gyaeundei, couh lumj go’myokgveiq ndaw fwn nei.

(Couh Swjhih raiz/

Veiz Munglingz hoiz)