Daxmeh miz aen suenbyaek iq ndeu, ndawde ndaem lwgbieng、 lwggve, lij miz makyungz.

Gou ceiq haengj dwg lwgbieng. Daxmeh youq ndaw suenbyaek dap aen gaq ndeu, lwgbieng yaek riengz gyaq dangh doxhwnj. Gij gaeu saeqraez haenx gaem diuz saux ndaetndaet bae, baez yamq baez yamq dangh hwnjbae, lumjbaenz naeuz:“Gou aeu maj sang!” Gou ngoenzngoenz cungj riuj aen huzraemx, siujsim riri dwk raemx coq lwgbieng, muengh gyoengqde maj hung.

Miz baez ndeu, gou saedcaih nyaenx mbouj ndaej, caegcaeg mbaet le aen lwgbieng ndeu, caj mbouj gib dwk haeb gaemz ndeu. Aiya, gij oen coeg bak gou in! Daxmeh yawjraen le, riu daengz dungx byonj:“Duz meuz gvij, aen lwgbieng neix lij caengz baenz ne!” Gou lumh bak in, hix nyaenx mbouj ndaej riu lo.

Daengz mwh lwgbieng ngamq sou, gou sim’angq dwk riuj aen lamz iq, gaen daxmeh bae mbaet. Gou ndwn youq gwnz daengq, ndiengq byaidin, iet gen raez, roengzrengz iet fwngz bae mbaet lwgbieng venj gwnz gaeu sangngeu haenx. Baez mbaet aen ndeu, ndaw sim gou doq angqvau liux!

(Vangz dunghyij raiz / Danz Yaujsuh hoiz)