Bi’gvaq sujgyaj, miz ngoenz ndeu lajbyonghngoenz, gou caeuq bohlungz、daxboh caez bae Bwzhaij Yingzgouj epbya. Ngoenzhaenx mbwn gvengq, rumz cififi, ndit mbouj suenq ndat, ceiq hab epbya lo. Gou bwh ndei faexset、aenrieng、ngaeuhbya doengh- gij doxgaiq epbya neix le, couh buet bae henzhaij epbya. Neix dwg gou baez daih’it epbya. Youq gwnz roen, gou angq dangqmaz, cam neix cam haenx, muengh bae daengz henzhaij vaiq di. Gvaq buenq aen lai cungdaeuz, dou daeuj daengz baksok haij lo.

Gou sim gaenjlili dawz diuz faexset lumj diuzdwngx haenx cuengq haeuj ndaw haij bae. Gvaqlaeng, gou cij rox, epbya gaxgonq, aeu youq gwnz bakset ngaeu ngaeuhbya. Ngaeuhbya dwg duzlix, yak yawj, aenndang raezrangrang, lumj duz sipndangj, youh lumj duzndwen. Gou aeu ngaeuhbya venj gwnz bakset, ndang duzde lij ning, gou lau dangqmaz. Daxboh riu gou dwg boux damjiq ndeu. Gou mbouj fugheiq, nyengh bae guh, doeklaeng haujlai nanz cij venj ndaej ngaeuhbya haeuj bakset bae. Venj ngaeuhbya ndei le, gou couh vut faexset haeuj ndaw haij bae, liux le couh naengh youq gwnz aen daengqiq caj duzbya daeuj gwn set. Hainduj caj geij faen cung haenx, gou mbouj miz naihsim, yaepyaep youh sou faexset dauqma, yawjyawj miz mbouj miz duzbya hwnjset. Daxboh naeuz: “Gaej gip lai, aeu miz naihsim, miz naihsim couh itdingh ep ndaej duzbya. Mwngz ning bae doengh dauq, duzbya cungj deng mwngz hwk deuz lo.”

Dingq daxboh gangj yienghneix le, gou couh dinghcub naengh youq gwnz daengq naihsim caj. Gou cim- yawj gwnzhaij, youh gvaqbae daihgaiq miz haj faencung, gou roxnyinh maeset caem roengz raemx bae, couh gaenjgip sou faexset dauqma. Swnh maeset yawj gvaqbae, gou yawjraen duz bya iq ndeu saetyatyat! Gou angq dwk diuq hwnjdaeuj, duz neix dwg duz bya nduj gou ep ndaej ha. Daxboh dwen gou nyi, duzbya neix dwg byaloz. Gou angq lai lo, roxnyinh ngoenzneix guh baenz gienh saeh hung ndeu.

Gou daj gwnz bakset aeu duzbya iq roengzdaeuj, yawjraen neix dwg duzbya gig dwggyaez ndeu. Duzbya hung lumj fajfwngz nei, ndang hausaksak, fwed ronghcingxcingx, aen bak caeuq hwk baez aj baez haep, diuzrieng youq ndaw fwngz gou bi bae bi dauq. Aen ndang duzbya raeuz- radrad, cungj siengj daj ndaw fwngz gou cak deuz. Gou gaenjgip cuengq duzbya haeuj ndaw aenrieng bae, de youh ndaej youq ndaw raemx angq dwk youz hwnjdaeuj. Gvaq le sam seiq aen cungdaeuz, gou ep ndaej caet duz bya. Yawj hwnjdaeuj, epbya mbouj lumj gou siengj baenz yienghhaenx nanz ep.

Daengngoenz yaek doekbya, dou dawz aenrieng bya rim haenx dauq ranz. Gij saeh epbya ngoenzneix hawj gou geiq ndaej ceiq laeg. Moix baez gou siengj hwnjdaeuj, cungj roxnyinh ndaengmoj lai, sim’angq lailai.

(Liuz Cincinz raiz /Veiz Yennaz hoiz)