Gaxgonq, ranzmbanj gou luenh dap luenh hwnj rienghmou ranzgaeq, dauqcawq miz nyapnyaj; seizneix, ranzmbanj gou yienghsiengq moqsaksak. Daxgoeng roekcib bi gou aenvih aeu gyaeujien vuenh doenghyiengh, daj bouxcitien bienqbaenz “bouxgeq hoh vanzging” ndeu lo. Hoeng, gij saeh lumj daxgoeng gou nei henhoh vanzging lij aeu engq lai vunz bae cienzciep.

——Daezgeiq

Gizneix, seiqgeiq faenmingz, roeg ciuz va rang; gizneix, raemxdah heu lumj gingq, yaengyaeng lae coh baihdoeng; gizneix, bya hung doxrangh hwnj- roengz, mwncupcup; gizneix, ranzmbanj yiengh- siengq gyaeugetget moqsaksak…… Gizneix couh dwg ranzmbanj gou, aen mbanj gyaeundei naengh youq henz Dahsinh’anhgyangh ndeu.

Gij diegyouq ranzmbanj ndei mbouj ndei vunzlai cungj gig gvansim. Gaxgonq, ranzmbanj gou luenh dap luenh hwnj rienghmou ranzgaeq, daihloh gehhongh dauqcawq miz nyapnyaj, yingjyangj le gij swnghdai vanzging diegyouq. Vihliux gaijgez aen vwndiz neix, cwngfuj ranzmbanj dou ceiqdingh le baenzroix cwngcwz baujhoh swnghdai vanzging, dazyinx gyoengq vunzmbanj byaij diuz roen saek- heu.

Couh youq mwh gou doeg sam nienzgaep, ndaw mbanj hai aen cauhsi ndeu heuhguh Swnghdai Ndei Cauhsi. Daxgoeng gou dwg cunh cujyin, roxdaengz ndaej yungh gyaeujien、denciz feiq、aenbingz nungzyoz doengh gij doxgaiq bae vuenh gaiq- yungh gwndaenj aen siusik neix, de sim’angq liux, aeu rox de dwg bouxcitien geq ndeu ne, moix ngoenz aeu cit song sam bau ien. Gaxgonq ndaw ranz rog ranz cungj dwg gij gyaeujien de vut haenx, seizneix caiq yawj mbouj raen gyaeujien lo. Daxgoeng mwh mbouj miz saeh, cungj caeuq ndaw ranz naeuz de yaek okbae liuh, vunz ndaw ranz cungj rox de dwg bae ndaw mbanj ra gyaeujien, cijmiz soucomz gyaeujien engq lai, cij ndaej vuenh gaiqyungh ngoenzyungh engq lai.

Siengj mbouj daengz, daxgoeng aenvih gip gyaeujien, gingqyienz gip ndaej le aen mingzdaeuz hom “bouxgeq hoh vanzging”. Dingq vunz ranznden naeuz, daxgoeng haidaeuz dwg vihliux vuenh aeu gaiqyungh ngoenzyungh cix bae gip gyaeujien、denciz feiq; doeklaeng daxgoeng rox swnhfwngz dawz gij nyapnyaj doek youq gwnz roen haenx gip roengz ndaw doengj nyapnyaj, caiqlij yawjraen bakdou ranz lawz luenh ndek labsab, de couh roq aen dou ranz de, ndij bouxcawj gangj aeu hawj diegyouq seuqcingh、hoizwngq cwngfuj gij haucauh gvendaengz nyapnyaj faenloih doengh gij vah neix, daxgoeng lumjnaeuz dwg boux senhconz vanzbauj cwngcwz ndeu lo.

Daxgoeng “liuh” ngoenz dem ngoenz le, gij vanzging ndaw mbanj menhmenh bienq lo, gyoengq vunzmbanj daihdaej ndaej guhdaengz ciuq loih douzcuengq nyapnyaj, bakdou ranz hix guhdaengz le “sam bau”…… Hehe, siengj mbouj daengz, daxgoeng roekcib bi le dauqfanj bienqbaenz “bouxgeq hoh vanzging” ndeu, daiq aen mbanj miz ok yienghsiengq moqsak vanzbauj.

(Yiz Liengyenz raiz / Lij Lungzfangh hoiz)