Baihdoeng ngamq ronghhau didi, banhaet dahcej couh ndwj fouq da moengzloengz de, daengngoenz daxgoeng daenj geu buh ronghhenj hawj naed raemxraiz byai mbaw. Youq banhaet gyaeundei neix, gou caeuq daxmeh cix hainduj ciengz “doxbuek hwnqcongz” ndeu.

Ciu daih’it: Roq dou. Daxmeh sup gaemz heiq ndeu, aengq daengx ndang rengz, vaiqvwt okrengz roq dou. Cungj gaenjcieng haenx, boux damzciengq hix beij mbouj gvaq de ba? Song fwngz rengzrwdrwd de haenqrengz roq, lumj aen dou neix couh dwg aen gyong naj dou yaxmonz nei, de miz ien lailai, yaek hemq ok fofo bae! Cungj heiqseiq roq gyong ndaek laz neix, sikhaek hawj gou youq ndaw ninzndaek loqfangzhwnz haenx doeksaet hwnjdaeuj. Gou najbyak nyaeuqnywdnywd, hozndat lai mbouj siengj leixlangh de, goemq rwz coq, laebdaeb loqfangzhwnz bae lo.

Ciu daihngeih: Rongh daeng. Daxmeh roengz- rengz nyoengx dou, hujdengdeng biengj denz bae, fajfwngz okrengz bongx aen haigven——daeng rongh lo, diuz rongh coegda ndeu ciuq dwk gou hemqvava. Seizneix daxmeh lumj duzguk huj- dengdeng ndeu, naj de hoengz raeng, noh gwnz naj saenzdikdik, bwn’gyaeuj daengjfo, najbyak nyaeuq baenz song diuz cagndaij, song da hoengzhwdhwd luenzlulu……Deng yienghneix haep gou heiq cungj mbouj gamj diem hung, cij raen de menhmenh byaij gyawj, song fwngz gaemgienz, genga haen dwk, heuj yiengj gyadgyad. Doeklaeng de hozdek lo: “Mwngz lij caengz hwnq ma?” Seizneix, gou naj ndatndwt, sim diuqdwt, lumjnaeuz haeuj dieg ndaw deihlauz feiz coemh haenx bae. Yienghneix, gou sikhaek rag denz, saenzdikdik ndonj haeuj ndaw denz bae, gij rongh daeng lumj raemxrongz cung daeuj haenx deng aen fai——fajdenz maenhcwdcwd lanz youq baihrog.

Gou canggyaj mbouj dingqnyi, siujsim sisi ndomq ok gok denz laeglemx yawj, ngamq yawj deng daxmeh yawj gou. Seizneix, fajnaj lumj fwjlaep de menhmenh bienqbaenz cungj fwjsaek saenzmaed, de hemq naeuz: “Gou yawj mwngz naeng humz lo! Gou daezsingj mwngz, danghnaeuz caiq mbouj hwnq, gou couh yaek cuengq ciu leixhaih lo!”

Ciu daihsam: Yaekij. Daxmeh menhmenh sup gaemz heiq naek ndeu, byai din roengzrengz, ndang yat hwnjdaeuj, bongh gvaq gwnz mbonq daeuj, yaepyet couh coemj youq gwnz denz, guengzbag yaekij gou. Gou raemxda yaek conh doq riu doq daej, mbwngyaengyaeng hemq naeuz: “Gou hwnq, gou hwnq, gouz mwngz cuengq gou lo!”

Ai, miz gijmaz banhfap ndaej hawj gou ndoj gvaq ciu daihsam daxmeh ne, aen gyaeuj iq gou hainduj baenqlulu hwnjdaeuj……

（Cinz Yihanz raiz/Veiz Yinyiz hoiz）