Ngoenzhaenx hwnj goqyijvwnz, dou hag hot sei Bwz Gihyi《Gwnz Daemz》. Lauxsae vix mbaw capdoz ndaw saw, gejnaeuz gij eiqsei hot sei “mbouj rox yo riz ndang, gobiuz faen baenz luengx” hawj daihgya.

Fuk capdoz neix saek citcit、heuheu di, lumj vehraemxmaeg ityiengh miz seieiq, gou mbat ndeu couh deng de ciuyinx lo. Baenzneix, gou dwg mbouj dwg hix ndaej sawqsawq veh fuk capdoz ne？

Yienghneix, gou aeu gij sa caijsaek youq goqmeijsuz yungh haenx okdaeuj, sa sa sa, sa sa sa, haeujsim sisi veh hwnjdaeuj: Roeghenj、roegcaeuq、 ruzseng’eiq……

“Mwngz guh gijmaz？”

Gou ngaemgyaeuj yunghsim veh veh, sawqmwh deng sing yiemz laeuxsae dajduenh. Gou muengz ndwn hwnjdaeuj, cij siengj daengz ndanggaeuq lij hwnjgoq.

“Veh ndaej gig ndei, hoeng aeu nyinhcaen dingq goq. Fuk veh neix deng lauxsae muedsou lo!”

Gou lienzlienz ngaekgyaeuj, sim ndaemq- ndaeq naengh roengzdaeuj. Ngoenzneix gij seizgan lij lw haenx, gou youh ienqhoij mbouj souj gijliz goqdangz, youh niemh fuk veh lijcaengz veh baenz haenx.

Mbouj liuh daengz, mwh cuengqhag, lauxsae gingqyienz doiq fuk veh haenx dauq hawj gou, lij anbaiz cozyez heuh dauq ranz le veh fuk “veh ha sei” ndeu hawj daihgya ne!

(Dai Yuzyi sij / Lij Yanghlenz hoiz)