Mwngz dwkgyangq gvaq lwi? Couh dwg dawz cag fad daej gyangq, hawj de baenq hwnjdaeuj. Gou gig gyaez dwkgyangq, hoeng cuengq hawj de baenq le, aeu cag fad, aen’gyangq couh laemx lo, gou baenzlawz siengj cungj siengj mbouj doeng. Cingqndei, ngoenzneix gou bae ranz goengnax、buznax gwn haeux, yaek youq haenx daengx ngoenz. Ranz gyoengqde gyanghongh gig gvangq, ceiq ndei dwkgyangq la!

Ngamq daengz ranz buznax, cam ndei liux, gou couh sohsoh buet bae gyanghongh, aeu aen’gyangq okdaeuj dwk. “Ai, lij dwg dwk mbouj baenz.” Gou miz di naiqheiq lo.

“Aiyo! Neix mbouj dwg Denzdenz ma?” Yienzlaiz dwg bohnax gou daeuj lo, “neix mbouj dwg aen’gyangq ma? Mwh iq gou ngoenzngoenz aeu daeuj guhcaemz, hawj gou sawqsawq.” Bohnax ciep gvaq aen’gyangq, dwk hwnj- daeuj. Gou gangjnaeuz bohnax baez fad couh laemx, siengj mbouj daengz aen’gyangq baenq ndaej onjonj dangqdangq, lij yied baenq yied riuz. Gou bak ajvauvau, gig gingheij.

“Daeuj, gou son mwngz!” “Ndei!” Gou sikhaek nyinhcaen hag hwnjdaeuj……

Bohnax naeuz, dwkgyangq itdingh yungh rengz, gou yungh rengz iq lai lo, caemhcaiq gou lij ciengzciengz fad daengz ndang gyangq, itdingh aeu fad giz ceiq laj de. Gou sikhaek baenq aen’gyangq, ciuq vah bohnax guh. Gaem diuzcag, naed raemxhanh ndeu daj najbyak gou doek roengzdaeuj. Gou cimyawj aen’gyangq, yungh rengz fwt fad gvaqbae, de diuq bae henz, gou mbaetheiq, aen’gyangq onjonj roengzdeih, de mbouj laemx, ciuqyiengh youq gwnz namh baenq. Ye, gou guh daengz lo! Bohnax youq baihhenz danq ndei coenz dem coenz, gou engq angq lo, laebdaeb fad aen’gyangq, de yied baenq yied riuz, gou hix yied daeuj yied sim’angq.

Ngoenzneix caen dwg ngoenz angq ndeu, gou cimz daengz feihdauh guh ndaej baenz. Guh ndaej baenz dwg cenj laeujvan ndeu, guh ndaej baenz dwg souj sei gyaeundei ndeu, guh ndaej baenz dwg ndit raeujrub……Gou hag rox dwkgyangq lo, baezneix guh ndaej baenz, geiq roengz gij roxnyinh ceiq ndei gou, hawj gou dauqngeix mbouj liux.

( Sij Lozfeih/sij Lij Yanghlenz/hoiz）