Gaxgonq aen siujgih ranz gou youq haenx miz benq diegnya gvangq ndeu, mbouj miz vunz guenjleix, mbouj miz vunz coih daet, nyaemh de gag maj gag hwnj go’nya gova. Nyabanhrag raih gwnz dieg rim liux; nyariengma bongh sang gvaq gyaeujhoq lwgnyez; gij va baq saepsaep soiqsoiq haenx, gizneix nyup ndeu, gizde nyoemq ndeu……Hoeng mbouj geijlai nanz, duihdujgih conx benq nya neix, diegnya bienqbaenz roen suijniz，mwnhoengh mboujcaiq miz lo.

Seizhah gvaq banringz le, ndit haenq baenz feiz, dak gij naeng gyaeuj manh- saengsaeng, hawj vunz gvaq loh mbouj gamj ngiengx gyaeuj, faexdongz henz roen gij mbaw hung baenz fajfwngz haenx gutgungq dwk, gij gyap naengfaex bok loenq haenx hawj gofaex hunghung sangsang hix lumj baenz bingh naek nei doixywdywd. Gou raen le couh baenz simnyap, liux le ganjvaiq byaij gvaqbae, ndoj haeuj gehhongh yaemliengz bae. Gehhongh song henz cungj dwg gij ranzgaeuq dangq aen dangq youq haenx, faqciengz lijdwg gij gikheu fwngz lumh le caepcatcat, yiemhranz lingq dangj gij ndit haenq haenx, gou raen daengx ndang sangj caemx mbouj noix.

Geh gik faqciengz ndonj haujlai go gutriengfungh iq raez iq raez okdaeuj, heu- yauyau dawz da liuxliux, gij rumz mbouj rox daj gehhongh lawz ci gvaqdaeuj, gyoengqde gingqyienz gag diuq foux yedyed. Gou sawq- mwh vuenheij, simnyap deng boq deuz caez lo. Mumjgyumq dingqnyi duzrwi mbin “vung vung”, yaep ngiengx gyaeuj couh yawjraen ndaw hongh ranz vunz ndeu ndaem miz go faexvuengz hungsang ndeu, va de hoemq gvaq gyaeuj ciengz, gyaeundei dangqmaz.

Gou angqyangz dwk buet gvaqbae, yawjraen gij va saek nonhgyaemq gyonj baenz benq ndeu, yienznaeuz dak ndit haenq, hoeng mbaw mwnz iq de lij gamj iet okdaeuj, cengqheiq iet hwnj gwnz mbwn bae. Aen sim gou riengz gij vahaij hoenghhwdhwd neix, hix caemhcaez hoenghhwdhwd hwnjdaeuj lo.

Gij limqva govuengz mboepgumh mbouj bingz, hoenghhwd comz baenz guh aen guh aen giuz iq, gyoengqde ndwetfwdfwd doxgot, haujlai rwi hung nduenndu’ndu youq ndaw geh va mbin bae mbin dauq. Miz duz rwi ndeu “vung vung” mbin daengz foengq va henz ndang gou, ndonj haeuj va bae, lahdawz gij vafaenj saekhenjgim raih okdaeuj. Dingq duzrwi mbin “vung vung vung”，mup gij heiq va hombyembyem neix, aen sim gou mbouj caiq laekgaek, couh caemrwgrwg laeglemx yiengjsouh ndwi lo.

Cungj roxnyinh neix gig sug! Gou lumjbaenz caiq yawjraen gij nya gij va cabluenh haenx youh dok nyod maj mbaw lo, heiq nya hombyembyem、heiq va hom naekna, cingq buenx gij hoenghhwd neix roenxfwdfwd. Mwnhoengh lij youq! Saekheu couh youq henzndang gou, gyoengqde gamj youq giz gungxgex cuengqlangh sengmaj, hawj boux gvaq loh raen gij sengmingh gyaeundei caeuq homfwtfwt.

Byaij youq gwnz gai nauhyied neix, gou rox, saekheu mwnhoengh couh youq henz- ndang gou, buenx gou majhung.

（Cuh Gyahyinh/raiz Veiz Yen’gyangz/hoiz）