Baenzlai lwgmak, gou ceiq maij makbug, mbouj vih gijmaz, caenh aenvih gwnz makbug miz daxmeh gyaez gou.

Ngoenzhaenx, ma daengz ranz, cuengq daehsaw, gou lumj bingzciengz ityiengh aeu bonj cozyez okdaeuj, yawj daezmoeg baez youh baez, hoeng uk gou lumj roen raek le, baenzlawz hix siengj mbouj ok banhfap gejdaez.

Sawqmwh, miz sing yiengj heuh gou ndiu dauq, cijraen daxmeh cingq dawz dohbaj haeujdaeuj uet deih, sing “dungdungdung”itcig cienz haeuj rwz gou, gou simgaenj dwk doiq daxmeh naeuz:“Uet deih itdingh aeu seizneix uet ha? Yienghneix hawj gou baenzlawz sij cozyez ha!” Daxmeh ngiengx gyaeuj ngawh yaep ndeu, lumjnaeuz mingzbeg gijmaz, siujsim riri dwk dawz dohbaj okbae lo. Gou hix ngawz lo, daxmeh mwh yaek byaij miz di siengsim, gvaengzda miz di cumx, gij yiengh neix mbouj- duenh okyienh youq ndaw uk gou, lumj fag giemq raeh ndeu mbongq sim gou.

Siengj liux haujlai nanz, gou cinjbi hwnqndang yiengq daxmeh boizlaex, hoeng couh youq gou cienq ndang yaep haenx, daxmeh haeujdaeuj lo, ndaw fwngz dawz gij makbug de mbiq ndei haenx, hozunq naeuz gou: “Saedcaih mbouj rox guh, couh sien cuengq gonq, yietnaiq yaep ndeu.”Geij coenz vah genjdanh haenx hawj gou daengx ndang raeujrubrub.

Gou naengh roengzdaeuj, dingh- dingh yawj baihnaj buenz makbug mbiq ndei neix, nohmak ndongq lumj rinbauj, aeu fwngz lumh hwnjbae couh raeuz lumj nyawh nei. Gou yungh fwngz menhmenh dawz limq ndeu hwnj, dawz haeuj laj ndaeng mup baez ndeu, gij heiq homfwdfwd hawj ndaw sim gou mbouj caiq simgaenj, haeb gaemz iq ndeu, ndaw van miz geu soemj ndeu. Yienznaeuz gou gig haengj gwn makbug, hoeng ngoenz- neix gou cix gwn ndaej gig menh, mbouj lumj bingzciengz ityiengh gwn- guk. Aenvih gou rox, buenz makbug dangqnaj neix gietcomz gij gyaez daxmeh rimrim bae.

Mbouj rox vih gijmaz, gwn dwk gwn dwk, ndaw sim fwt miz raq siengsim ndeu, youq ndaw raemxda gou raen daxmeh dwgrengz guh hong, rag dohbaj baebae dauqdauq, camx haeuj sim gou.

(Cangh Vangz Suyangz raiz / Danz Yaujsuh hoiz)