Ngoenzneix gou caeuq daxmeh guhdoih bae Hozmeij Cinzdangz youz, gamj daengz daemzngaeux gig gyaeundei.

Lij caengz bae daengz daemzngaeux, gou daj gyae couh nyouq ndaej baenz raq baenz raq heiq homfwtfwt. Daeuj daengz daemzngaeux, raq heiq engq hom lo, ndaw rumz lumj daiq miz feih diemz dem.

Byaij daengz henz daemzngaeux, raen mbawngaeux caeuq va’ngaeux doxdaengh doxingj, gyaeundei lumj fuk doz nei. Gij mbawngaeux hunghanghang heuswdswd lumj boux swbingh ityiengh ndwn youq ndaw daemzngaeux, henhoh va’ngaeux, bang va’ngaeux oiqwt dangj rumz dangj fwn. Gou ndwn youq henz daemz, ndenq fwngz bae rumh mbaw de, gij liengzsisi couh raih hwnj byaifwngz gou daeuj. Gij va’ngaeux gyaeundei haenx, baenz duj baenz duj, hoengzmaeq fwdfwd, limqva lij daiq miz hausak, couh lumj dahsien daenj geu buh hausak. Gij limqva va’ngaeux miz mbangj cungj hai lo, lumj boux dahsau gyaeundei, cuengqlangh gij gyaeundei de; miz mbangj ngamq hai mbiengj he, lumj dahsau najmong, dawz mbiengj naj ndeu goemq hwnjdaeuj; mizmbangj lij dwg valup ne, lumj boux lwgnyez dam ninz.

Seizneix, miz duz goep ndeu diuq hwnj gwnz mbawngaeux heuh “gva gva gva”, lumj danqhaenh gij gingjsaek gyaeundei nei. Gij bya ndaw daemz hix youz ndaej engq vaiqvued lo, lumj dwg gij gingjsaek gyaeundei sawj simcingz de engq ndei lo. Sawqmwh, miz duz biengzbeih ndeu mbin gvaqdaeuj ndwn youq byai va’ngaeux, neix sawj gou siengj hwnj “va’ngaeux ngamq ok lup soemset, caeux miz biengzbeih ndwn gwnz dingj” hot sei neix.

Gou couh yienghneix dinghdingh ndwn dwk yawj va’ngaeux, daengngoenz yaek doek roengz bya lo, roeglwg heuh cici caca cij dawz sim gou heuh dauqma. Daxmeh doiq gou naeuz:“Mbwn haemh lo, raeuz vaiqdi baema ranz ba.” Gou cij sij mbouj ndaej deuz lo.

Daemzngaeux ha daemzngaeux, mwngz dwg yienghhaenx maezvunz. Gou gyaez mwngz, daemz- ngaeux gyaeundei!

美丽的荷塘

今天，我和妈妈一起去荷美覃塘游玩，感受到了荷塘的美。

还没到荷塘，我远远就闻到了一股淡淡的荷花清香。到了荷塘边，香味更浓郁了，空气中仿佛带着一股甜味呢。

进入荷塘，映入眼帘的是荷叶与荷花相映成趣的美丽画卷。大片大片的荷叶像士兵一样立在荷塘中，保护着荷花，为娇艳的荷花遮风挡雨。我站在荷塘边伸手轻轻触摸它，一丝清凉便涌上了指尖。而那美丽的荷花，一朵朵，粉红粉红的，花瓣又带一些雪白，就像仙女雪白的衣裳。那荷花的花瓣有的全展开了，像美丽的小姑娘，尽情地绽放着它的美；有的花瓣只开了半边，像羞涩的少女，害羞地把半边脸遮住了；有的还是花骨朵儿呢，像一个贪睡的小宝宝。

这时，一只青蛙跳到了荷叶上，“呱呱呱”地叫着，仿佛在赞美这美丽的景色。水里的鱼儿也游得更欢快了，像是这美丽的景色使得它心情更好了。突然，一只小蜻蜓飞到了荷花上，让我不由地想到了“小荷才露尖尖角，早有蜻蜓立上头”的诗句。

我就这样一直观赏着荷花，直到夕阳西下时，小鸟的叫声才把我的心唤回来。妈妈对我说：“天晚了，我们该走了。”我才依依不舍地离开。

荷塘啊荷塘，你是那么的迷人。我爱你，美丽的荷塘！

(lauxsae son raiz： Luz Siujmei / 指导老师：陆小媚）