Bineix aen gyajgeiz seiznit, gou youh yawj le haujlai saw, ndawde hawj gou geiq ndaej ceiq laeg dwg 《Aen Goj Roegenq Caeuq Roegga》ndaw bonj 《Gojbeij Yihsoz》.

Aen goj neix cujyau dwg gangj duz roegga ndeu caeuq duz roegenq ndeu beij gyaeu, gyoengqde cungj miz bwn ndaemndongq, cungj nyinhnaeuz swhgeij ceiq gyaeundei, mbouj doxnyiengh. Doeklaeng roeg- ga naeuz, gij gyaeundei mwngz youq aen geiqciet raeujrub cijmiz, gij gyaeundei gou, lij ndaej bang gou gvaq aen geiqciet nit. Daj aen goj neix ndawde, gou rox lo, raeuz yawj saehcingz, mbouj ndaej dan yawj yienghceij, mizyungh beij yienghceij engq youqgaenj.

Gou caemh miz baez ndeu lumj yienghneix. Geiq ndaej baez de, gou youq Sinhvaz Suhden yawjraen gaiq gau yienghceij lumj gungjlungz ndeu, conghbak de gig hung, song baiz heuj ndaw bak de gig raeh, daengx aen ndang yawj hwnjbae hix gig maenh’ak, depgyawj supsuq, gingqyienz lij nyouq daengz raq heiqhom noengznwd ndeu. Gou gyaez mbouj cuengq fwngz, saeuq daxmeh baenzlawz cungj aeu cawx, daxmeh naeuz:“Cungj gau neix cat mbouj seuq law.” Gou youh daej youh nauh mbouj haengj ok bouqsaw daeuj, doeklaeng daxmeh dingj mbouj gvaq gou, cijndei cawx hawj gou lo.

Doq daengz ranz, gou doq deq mbouj ndaej lo, doq cek gaiq suek de, angqfwdfwd yawj duz “gungj- lungz iq” cangqcup neix, lij daeg- daengq youq gwnz bonjbouh cozyez raiz loek geij cih saw le aeu gaiq gau neix daeuj cat, youq mwh gou daekeiq, couh raen caen lumj daxmeh naeuz nei, gaenbonj couh cat mbouj seuq. Gou mbouj fug, haenqrengz cat, yungh gyaeuj de cat mbouj seuq, yungh din de cat, yungh le daengx duz gungjlungz, cungj cat mbouj seuq, lij dawz giz raiz cihsaw loek haenx cat fonx liux. Caen dahraix, mizmbangj doxgaiq, raeuz mbouj ndaej dan yawj gij yienghceij baihrog de, aeu mizyungh cij dwg ceiq ndei.

(Lij Cwzyauz raiz / Lij Lungzfangh hoiz)