Bineix sam nyied sam,

Va rang mbwn engq raeuj,

Raeuz simhai angqcoux,

Haj saek haeux rang diemz.

Bi’gvaq gwnz hawfwen,

Singsing rwenz gvaq gyaiq,

Daj seiq fueng bet baih,

Yiedrairai daeuj comz.

Canghfwen doih youh doih,

Doxhoih rim bo ndoi,

Sai mbwk doiq youh doiq,

Raek gim soij lienhhoz.

Najriu sim va hai,

Mbwk sai eu fwen caeuq,

Yied eu yied haeujngaeuh,

Doengq haeuj ndok haeuj ngviz.

Seizdaih moq caez haeuj,

Danq guekgya raeuz ndei,

Vih lwgminz cengheiq,

Ndwenngoenz fouzbeij maez.

Cibbet Daih gvaqdaeuj,

Guek raeuz daih bienqyiengh,

“Gyaciz gvanh” fuengyiengq,

Vih saedyienh loqsiengj.

Cibngeih aen “cangh dauj”,

Dwg baujboiq guek raeuz,

Lumj gaethaeux gwn haeux,

Ciengz aeu fwen daeuj danq.

Daeuj lwnh gij gaijgwz,

“Hailangh” loh ndaej gvangq,

“Daegsaek” geiqmaeuz sang,

Bak gangj ok lwgfeiz.

Cibgouj Daih hoengh hai,

Geijlai guek hozhaenz,

Miz mbangj guek ndangsaenz,

Lumjbaenz ma lau guk.

Beijlumj Meij、Yiz、Yingh,

Ma dai sim mbouj naeuh,

Ciengz fatbag ciengz raeuq,

Siengj daeuj hangz guek raeuz.

Cibgouj Daih gvaqdaeuj,

Rox guek raeuz fouqgiengz,

Ndi gamj raeuq bub rieng,

Canggyaj swenj doh giz.

Daj seizneix doxbae,

Bi beij bi engq giengz,

Loq Cungguek saedyienh,

Guh yienghyiengh ndaej ndei.