It son raeuz okseiq,

Yaek rox ngeix cij baenz,

Rox boiz bohmeh aen,

Gimngaenz vuenh byawz guh.

Yiengz lwg yaek gwn cij,

Roengz hoq gvih haet gwn,

Nanzvi raeuz bouxvunz,

Deng funghswngz bouxlaux.

Ngeih son raeuz lwgbawx,

Yaek rox sawj goengyah,

Ngoenz guhhong dauqma,

Gaej ndaq de gwnndwi.

Mbouj rox nyiengh bouxlaux,

Cog goj dauq daengz raeuz,

Lumj aen gingq yawj ngaeuz,

Daengz raeuz geq goj heih.

Bawx rox dingh guh bawx,

Gaej bae daeuq goeng’yah,

Goeng youq goeng goj gvaq,

Yah youq cog goj dai.

Goeng’yah de baenzciuh,

Deihvih beij raeuz sang,

Guh bawx yaek caixhangz,

Vah gaej fanz bouxlaux.

Sam son raeuz goeng’yah,

Gaej luenh ndaq bawx raeuz,

Bawx dwg rog coux daeuj,

Dangq lwg raeuz bae gyaez.

Mbouj deng menh doxson,

Donq gwn baengh de caux,

Lwgmbwk daeuj goj maeux,

Nanz sei raeuz gvaq ciuh.

Raen miz di bouxlaux,

Gvenq nauh bawx ninz gvaiz,

Caux guh vah bak lai,

Mbouj wnggai yienghneix.

Seiq son beix dem nuengx,

Mbouj ndaej luenh doxceng,

Caemh daxmeh ndeu seng,

Cungj yaek deng doxnyiengh.

Faj fwngz miz hajlwg,

Miz lwg dinj lwg raez,

Beixnuengx miz geijlai,

Bengz cienh ndaej doxbang.

Haj son gvan dem baz,

Yaek doxgyaez gvaq ciuh,

Caih hoj miz cix liux,

Gaej diuz byawz ndi baenz.

Caez roengzrengz guhhong,

Mehmbwn ndomq goj raen,

Caux miz gwn miz daenj,

Doxgyaez van mued ciuh.

Gvanbaz yaek baenz ndei,

Mbouj miz vah doxdaeuq,

Ma doxhaeb cix raeuq,

Ranz doxdaeuq cix liengz.

Roek son baj dem liuz,

Caez gangj riufwfw,

Bajliuz caemh gya youq,

Cix mbouj mbwq nauq ninz.

Gyaranz guhdoih ganq,

Gyadangq doengzdoih swngz,

Doengzdoih lwg rog vunz,

Dinfwngz cungj ityiengh.

Caet son nangz dem gux,

Doengzcaez youq ranz ndeu,

Mbouj miz fok miz beu,

Riu he caez cauxgya.

Aeu de ma guh nangz,

Daengx ranzmbanj caez rox,

Cog ciep ham goengboh,

Wng’oq cix baengh de.

Nuengx guh cog bae haq,

Vut bohmeh raeuz ce,

Aen gya neix baengh de,

Ganq lwgnyez bouxlaux.

Nangz yaek rox guh nangz,

Gaej gangj sam vet seiq,

Haq daeuj doek ranz neix,

Yaek ndeindei guhgya.

Bet son gij lwglan,

Gaej uj sam gauz seiq,

Doegsaw yaek haenqheiq,

Fanhseiq gaej famhsaeh.

Youq ranz dingq bouxlaux,

Bae yau dingq lauxsae,

Cog gauj ndaej hwnjbae,

Mbanj ranz gyaez mbouj liux.

Gyahab fanhsaeh hwng,

Raeuz itdingh gaej lumz,

Caux miz daenj miz gwn,

Daengx ranz vunz caez angq.

Dohneix cienzgya bauj,

’gyauq raeuz vunzlai,

Caih mehmbwk bouxsai,

Cungj wnggai caez nenq.

Vih son lwg son lan,

Van Fwencuengh daeuj ciengq,

Son raeuz gyoengq beixnuengx,

Muengh gya’gya hwngvuengh.

Son